ଦେଶରେ ବେକାବୁ କରୋନା, ଦିନକରେ ପ୍ରାୟ ୨୩ ହଜାର ପଜିଟିଭ, ୪୮୨ ମୃତ

ନୂଆଦିଲ୍ଲୀ: ଦେଶରେ ଦିନକୁ ଦିନ କରୋନା ସ୍ଥିତି ଭୟଙ୍କର ହେବାରେ ଲାଗିଛି। କଣ୍ଟେନମେଣ୍ଟ ଜୋନ, ଟେଷ୍ଟିଂ ଓ ଟ୍ରେସିଂକୁ ଜୋରଦାର କରାଯାଉଥିଲେ ହେଁ ଭାରତରେ କରୋନା ପ୍ରକୋପ କମିବାର ନାଁ ଧରୁନି। ବର୍ତ୍ତମାନ ବିଶ୍ୱର କରୋନା କ୍ଷତିଗ୍ରସ୍ତ ରାଷ୍ଟ୍ରଙ୍କ ମଧ୍ୟରେ ତୃତୀୟ ସ୍ଥାନରେ ଥିବା ଭାରତରେ ପୁଣି ୨୪ ଘଣ୍ଟାରେ ୨୨,୭୫୨ ଜଣଙ୍କ ରିପୋର୍ଟ ପଜିଟିଭ ଆସିଛି। ଫଳରେ ଦେଶରେ ଆକ୍ରାନ୍ତଙ୍କ ସଂଖ୍ୟା ୭,୪୨,୪୧୭ରେ ପହଞ୍ଚି ଯାଇଛି।

ସେହିପରି ୨୪ ଘଣ୍ଟାରେ ଆଉ ୪୮୨ ଜଣ କରୋନାରେ ଆକ୍ରାନ୍ତ ହୋଇ ଆଖି ବୁଜିଛନ୍ତି। ଏହାକୁ ମିଶାଇ ଦେଶରେ କରୋନା ଜନିତ ମୃତ୍ୟୁସଂଖ୍ୟା ୨୦,୬୪୨କୁ ବୃଦ୍ଧି ପାଇଛି। ତେବେ ଆରୋଗ୍ୟଙ୍କ ସଂଖ୍ୟା ଆଜି ୪ ଲକ୍ଷ ୫୦ ହଜାର ଅତିକ୍ରମ କରିଛି। ଏଯାଏ ମୋଟ ୪,୫୬,୮୩୧ ଜଣ ସୁସ୍ଥ ହୋଇଥିବା ବେଳେ ୨,୬୪,୯୪୪ ଆକ୍ଟିଭ କେସ୍‌ ରହିଛି।

ମହାରାଷ୍ଟ୍ରରେ ପୁଣି ୫ ହଜାରରୁ ଅଧିକ କେସ୍‌ ସାମ୍ନାକୁ ଆସିବାରୁ ଏଠାରେ ଆକ୍ରାନ୍ତଙ୍କ ସଂଖ୍ୟା ୨,୧୭,୧୨୧ ଛୁଇଁଛି। ଯାହା ସାଉଦି ଆରବର ମୋଟ ସଂକ୍ରମିତ ସଂଖ୍ୟା ଠାରୁ ଅଧିକ। ଏମାନଙ୍କ ମଧ୍ୟରୁ ୯୨୫୦ ଜଣ ପ୍ରାଣ ହରାଇଛନ୍ତି ଓ ୧୧୮୫୫୮ ଜଣ ସୁସ୍ଥ ହୋଇଛନ୍ତି।

ତାମିଲନାଡୁରେ ପ୍ରାୟ ୩ ହଜାର କରୋନା ସଂକ୍ରମିତ ଚିହ୍ନଟ ହୋଇଛନ୍ତି। ରାଜ୍ୟରେ ଚିହ୍ନଟ ହୋଇଥିବା ୧,୧୮,୫୯୪ ଜଣଙ୍କ ମଧ୍ୟରୁ ୧୬୩୬ ଜଣ ପ୍ରାଣ ହରାଇଛନ୍ତି ଓ ୭୧,୧୧୬ ଜଣ ସୁସ୍ଥ ହୋଇଛନ୍ତି। ଦିଲ୍ଲୀରେ ବି ପ୍ରାୟ ୨ ହଜାର ନୂଆ ଆକ୍ରାନ୍ତ ଚିହ୍ନଟ ହେବା ପରେ ଏଠାରେ ସଂକ୍ରମିଙ୍କ ସଂଖ୍ୟା ୧,୦୨,୮୩୧ ଛୁଇଁଛି। ଏମାନଙ୍କ ମଧ୍ୟରୁ ୩୧୬୫ ଜଣ ପ୍ରାଣ ହରାଇଛନ୍ତି ଓ ୭୪,୨୧୭ ଜଣ ସୁସ୍ଥ ହୋଇଛନ୍ତି।

ଏହାବାଦ ଆନ୍ଧ୍ର ପ୍ରଦେଶରେ ୨୫୨,ଅରୁଣାଚଳ ପ୍ରଦେଶରେ ୨, ଆସାମରେ ୧୪, ବିହାରରେ ୧୦୪, ଚଣ୍ଡିଗଡ଼ରେ ୭, ଛତିଶଗଡ଼ରେ ୧୪, ଗୋଆରେ ୮, ଗୁଜରାଟରେ ୧୯୭୭, ହରିଆଣାରେ ୨୭୯, ହିମାଚଳ ପ୍ରଦେଶରେ ୧୧, ଜମ୍ମୁ-କଶ୍ମୀରରେ ୧୪୩, ଝାରଖଣ୍ଡରେ ୨୨, କର୍ଣ୍ଣାଟକାରେ ୪୧୬, କେରଳରେ ୨୭, ଲଦାଖରେ ୧, ମଧ୍ୟପ୍ରଦେଶରେ ୬୨୨, ମେଘାଳୟରେ ୧, ଓଡ଼ିଶାରେ ୪୨, ପୁଡୁଚେରୀରେ ୧୪, ପଞ୍ଜାବ ୧୭୫, ରାଜସ୍ଥାନରେ ୪୭୨, ତେଲେଙ୍ଗାନାରେ ୩୧୩, ତ୍ରିପୁରାରେ ୧, ଉତ୍ତରାଖଣ୍ଡରେ ୪୩, ଉତ୍ତର ପ୍ରଦେଶରେ ୮୨୭ ଓ ପଶ୍ଚିମବଙ୍ଗରେ ୮୦୪ ଜଣ ପ୍ରାଣ ହରାଇଛନ୍ତି।