ମୁମ୍ବାଇ: ମହାରାଷ୍ଟ୍ରର ଗଡଚିରୋଲି ଏନ୍କାଉଣ୍ଟରରେ ପୁଲିସକୁ ମିଳିଛି ବଡ ସଫଳତା। ଶନିବାର ପୁଲିସ ସହ ହୋଇଥିବା ଏନ୍କାଉଣ୍ଟରରେ ନିହତ ୨୬ ମାଓବାଦୀଙ୍କ ମଧ୍ୟରେ ରହିଛି ଟପ୍ ନକ୍ସଲ ମିଲିନ୍ଦ ତେଲତୁମ୍ବଡେ। ସେ ପୁଲିସ ଗୁଳିରେ ଆଖି ବୁଜିଛି। ଭୀମ କୋରେଗାଓଁ ମାମଲାରେ ମିଲିନ୍ଦ ମୁଖ୍ୟ ଅଭିଯୁକ୍ତ ଥିଲା । କେବଳ ଏତିକି ନୁହେଁ ତାଙ୍କ ଉପରେ ୫୦ ଲକ୍ଷ ଟଙ୍କାର ପୁରସ୍କାର ଥିଲା ।
ଗଡଚିରୋଲି ପୁଲିସ ଅଧୀକ୍ଷକ ଅଙ୍କିତ ଗୋଏଲ ରବିବାର କହିଛନ୍ତି, ପ୍ରାଥମିକ ପରିଚୟ ଅନୁଯାୟୀ ଶନିବାର ଏନକାଉଣ୍ଟରରେ ନିହତ ହୋଇଥିବା ୨୬ ମାଓବାଦୀଙ୍କ ମଧ୍ୟରୁ ମିଲିନ୍ଦ ଅନ୍ୟତମ । ବର୍ତ୍ତମାନ ଅନ୍ୟ ନିହତ ମାଓବାଦୀଙ୍କ ଚିହ୍ନଟ ଅଭିଯାନ ଚାଲିଛି । ମିଲିନ୍ଦ ସିପିଆଇ (ମାଓବାଦୀ) ର ଜଣେ ବରିଷ୍ଠ କାର୍ଯ୍ୟକର୍ତ୍ତା ଥିଲା ।
ବରିଷ୍ଠ ଗୁପ୍ତଚର ଅଧିକାରୀମାନେ କୁହନ୍ତି ଯେ, ମିଲିନ୍ଦ ନିୟମିତ ଭାବରେ MMC ଅଞ୍ଚଳ ପରିଦର୍ଶନ କରୁଥିଲେ ଏବଂ ଭିଷ୍ଟାରା ଡାଲାମ ନାମକ ଏମଏମସିର କମାଣ୍ଡୋ ୟୁନିଟ୍ ପାଇଁ ପ୍ରାୟ ୧୦୦ ଜଣ ସ୍ଥାନୀୟ ଲୋକଙ୍କୁ ନିଯୁକ୍ତି ଦେଇଥିଲେ। ତେଲତୁମ୍ବଡେ ବହୁ ସଶସ୍ତ୍ର ଅଙ୍ଗରକ୍ଷୀ ଏବଂ ମାଓବାଦୀଙ୍କ ଏକ ସ୍କ୍ୱାଡ୍ ସହିତ ଜଙ୍ଗଲରେ ବୁଲୁଥିଲେ।
୨୦୧୮ରେ ଆତ୍ମସମର୍ପଣ କରିଥିବା ବରିଷ୍ଠ ମାଓନେତା ପହର ସିଂଙ୍କ ଅନୁଯାୟୀ ତେଲତୁମ୍ବଡେ ଏହି ଜୋନ୍ ସମ୍ବନ୍ଧରେ ସଂଗଠନର ସମସ୍ତ ପ୍ରମୁଖ ନିଷ୍ପତ୍ତି ନେଉଥିଲେ। ତେଲତୁମ୍ବଡେ ଅନେକ ନାଁ ଜଣାଶୁଣା ଥିଲା। ମିଲିନ୍ଦ ବାବୁରାଓ ତେଲତୁମ୍ବଡେ, ଦୀପକ ତେଲତୁମ୍ବଡେ ଏବଂ ଜୀଭା ଭଳି ଥିଲା ତା'ର ଅନେକ ନାଁ।
ସୂଚନା ମୁତାବକ, ମୁମ୍ବାଇଠାରୁ ୯୦୦ କିଲୋମିଟର ଦୂରରେ ଥିବା ପୂର୍ବ ମହାରାଷ୍ଟ୍ରର ଗଡଚିରୋଲି ଜିଲ୍ଲାରେ ଶନିବାର ପୁଲିସ ଓ ମାଓବାଦୀଙ୍କ ମଧ୍ୟରେ ଗୁଳିବିନିମୟ ହୋଇଥିଲା। ଏହି ଏନକାଉଣ୍ଟରରେ ଅତି କମରେ ୨୬ ନକ୍ସଲଙ୍କ ମୃତ୍ୟୁ ହୋଇଛି ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
