ମୁମ୍ବାଇ: କ୍ୟାବ୍ ଭିତରେ ମହିଳାଙ୍କ ସହ ଦୁର୍ବ୍ୟବହାର। ବିରୋଧ ପରେ ଚଳନ୍ତା କାର୍କୁ ୧୦ ମାସର ଛୁଆକୁ ଫିଙ୍ଗି ଦେଲା ଯୁବକ। ଏଭଳି ଏକ ଅଭାବନୀୟ ଘଟଣା ଘଟିଛି ମହାରାଷ୍ଟ୍ରରେ।
ସୂଚନା ମୁତାବକ, ମହାରାଷ୍ଟ୍ରରୁ ଗୁଜରାଟ ଯାଉଥିବା ଏକ କାର୍ରେ ନିଜ ଝିଅ ସହ ଜଣେ ମହିଳା ବସିଥିଲେ। ତାଙ୍କ ସହ ଆଉ ଜଣେ ଯାତ୍ରୀ ମଧ୍ୟ ସେହି କାର୍ରେ ଥିଲେ। ତେବେ ଉକ୍ତ ଯାତ୍ରୀ ଜଣକ ମହିଳାଙ୍କୁ ଦୁର୍ବ୍ୟବହାର କରିଥିଲେ। ଏହାକୁ ମହିଳା ବିରୋଧ କରିବା ପରେ ତାଙ୍କ ୧୦ ମାସର ଛୋଟ ଝିଅକୁ ଯାତ୍ରୀ ଜଣକ ଚଳନ୍ତା କାର୍କୁ ଫିଙ୍ଗି ଦେଇଥିଲେ। ଝିଅକୁ ବଞ୍ଚାଇବାକୁ ଯାଇ ମହିଳା ଜଣକ ମଧ୍ୟ ଚଳନ୍ତା କାର୍ରୁ ଡେଇଁ ପଡିଥିଲେ।
ଶନିବାର ମୁମ୍ବାଇ ଉପକଣ୍ଠ ପାଲକର ଜିଲ୍ଲାର ମୁମ୍ବାଇ-ଅହମ୍ମଦାବାଦ ଜାତୀୟ ରାଜପଥରେ ଘଟିଥିବା ଏହି ଘଟଣାରେ ଛୋଟ ଛୁଆଟିର ମୃତ୍ୟୁ ହୋଇଛି। ସେପଟେ ମହିଳା ଜଣକ ଗୁରୁତର ଆହତ ହୋଇଛନ୍ତି। ତାଙ୍କ ମୁଣ୍ଡରେ ଗଭୀର ଆଘାତ ଲାଗିଛି। ଏହି ମାମଲାରେ ପୁଲିସ କ୍ୟାବ୍ ଡ୍ରାଇଭରକୁ ଗିରଫ କରିବା ସହ କାର୍କୁ ଜବତ କରିଛି।
ପୁଲିସ ସୂଚନା ମୁତାବକ, ମହିଳା ଯାତ୍ରୀ ଜଣକ କାର୍ରେ ତହସିଲର ପେଲହରରୁ ପୋଶେରକୁ ଫେରୁଥିଲେ। ମହିଳାଙ୍କ କହିବା ଅନୁସାରେ ସେହି ସମାନ କାର୍ର ପଛ ସିଟ୍ରେ ଆଉ ଜଣେ ବସିଥିବା ଯୁବକ ତାଙ୍କୁ ବାରମ୍ବାର ଭୁଲ୍ ଢ଼ଙ୍ଗରେ ଛୁଇଁବାକୁ ଚେଷ୍ଟା କରୁଥିଲା। ଏହାକୁ ପୀଡିତ ମହିଳା ଜଣକ ବିରୋଧ କରିଥିଲେ। ଏହାପରେ ଯୁବକ ଜଣକ ରାଗିଯାଇ ମହିଳାଙ୍କ କୋଳରେ ଥିବା ଛୁଆକୁ ଛଡାଇ ଆଣି ଚଳନ୍ତା କାର୍କୁ ଫିଙ୍ଗି ଦେଇଥିଲେ।
ଏହି ଘଟଣାରେ ୧୦ମାସର ଛୁଆର ମୃତ୍ୟୁ ହୋଇଛି। ସେପଟେ ମହିଳାଙ୍କ ଅବସ୍ଥା ମଧ୍ୟ ଗୁରତର ରହିଛି। ତାଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରାଯାଇଥିବା ପୁଲିସ କହିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
