ଶ୍ରୀନଗର : ପୋଲିସ୍ ଓ ସେନା ହାତରେ ଧରା ପଡ଼ିଛି ଆଉ ଏକ ପାକିସ୍ତାନୀ ଆତଙ୍କବାଦୀ। ଜମ୍ମୁ ଓ କାଶ୍ମୀରର ରଫିଆବାଦରେ ଏକ ଏନକାଉଣ୍ଟର୍ ବେଳେ ଏହି ଆତଙ୍କବାଦୀକୁ ଜୀବନ୍ତ ଧରିବାରେ ସକ୍ଷମ ହୋଇଛନ୍ତି ପୋଲିସ ଓ ସେନାର ଯବାନମାନେ। ଏହି ଆତଙ୍କବାଦୀର ନାମ ସଜାଜ ଅହମ୍ମଦ। ତା’ର ବୟସ ପ୍ରାୟ ୨୨ ବଷୟ ହେବ ବୋଲି ସେନା ପକ୍ଷରୁ କୁହାଯାଇଛି। ଗତ ମାସକ ମଧ୍ୟରେ ଦ୍ୱିତୀୟ ଥର ପାଇଁ ପାକିସ୍ତାନର ଆଉ ଏକ ଆତଙ୍କବାଦୀକୁ ଜୀବନ୍ତ ଧରିବାରେ ସକ୍ଷମ ହୋଇଛନ୍ତି ସୁରକ୍ଷାକର୍ମୀ । ଏହା ପୂର୍ବରୁ ଆଉ ଏକ ଆତଙ୍କବାଦୀ ‘ନାଭେଦ’କୁ ଧରା ଯାଇଥିଲା। ତାକୁ ଜମ୍ମୁ ଓ କାଶ୍ମୀରରେ ଉଦାମପୁରରୁ ସ୍ଥାନୀୟ ଲୋକଙ୍କ ସହାୟତାରେ ଗିରଫ କରାଯାଇଥିଲା।
ଆଜି ରଫିଆବଦରେ ହୋଇଥିବା ଏନକାଉଣ୍ଟରରେ ଆଉ ତିନି ଜଣ ଆତଙ୍କବାଦୀ ନିହତ ହୋଇଛନ୍ତି।
ସୂଚନାଯୋଗ୍ୟ, ପାକିସ୍ତାନ ଅଧିକୃତ କାଶ୍ମୀରରେ ଲସ୍କର-ଇ-ତୋଏବା ସହିତ ଆଉ କିଛି ଆତଙ୍କବାଦୀ ସଂଗଠନର ୩୦୦ରୁ ଅଧିକ ଆତଙ୍କୀ ଭାରତରେ ଅନୁପ୍ରବେଶ କରିବାକୁ ଡେରା ପକାଇଛନ୍ତି ବୋଲି ଗୁଇନ୍ଦା ପକ୍ଷରୁ ସୂଚନା ଦିଆଯାଇଛି।