ନୂଆଦିଲ୍ଲୀ: ଜିଓରୁ ଅନ୍ୟ ନେଟଓ୍ୱର୍କକୁ କଲ୍ କଲେ ମିନିଟ୍ ପିଛା ୬ ପଇସା ଗ୍ରାହକଙ୍କୁ ଦେବାକୁ ପଡ଼ିବ। ୯ ତାରିଖ ଦିନ ଜିଓ ଏହି ଘୋଷଣା କରିଥିଲା। ଏହାପରେ ଗ୍ରାହକଙ୍କ ମନରେ ପ୍ରଶ୍ନ ସୃଷ୍ଟି ହୋଇଥିଲା କେବେଠୁ ଏହି ନିୟମ ଲାଗୁ ହେବ। ଗତକାଲି ରିଲାଏନ୍ସ ଜିଓ ଟୁଇଟ୍ କରି ଏହି ପ୍ରଶ୍ନର ଜବାବ ଦେଇଛି। ଅକ୍ଟୋବର ୯ ଓ ତା ପୂର୍ବରୁ ଯେଉଁମାନେ ଅନ୍ ଲିମିଟେଡ୍ ଭଏସ୍ କଲ୍ ପ୍ୟାକ୍ ରିଚାର୍ଜ କରିଛନ୍ତି, ସେମାନେ ଏହି ଅବଧି ଶେଷ ହେବା ଯାଏ ଅନ୍ୟ ନେଟଓ୍ୱର୍କକୁ ଫ୍ରି’ରେ କଲ୍ କରିପାରିବେ ବୋଲି ଜିଓ କହିଛି।
ଅଧିକାଂଶ ଲୋକ ଜିଓର ୮୪ ଦିନର ପ୍ୟାକ୍ ବ୍ୟବହାର କରୁଛନ୍ତି। ହେଲେ ଯେଉଁମାନେ ବର୍ଷିକିଆ ପ୍ୟାକ୍ ରିଚାର୍ଜ କରିଛନ୍ତି, ସେମାନଙ୍କୁ ଆଇୟୁସି ଚାର୍ଜ କେବେଠୁ ଦେବାକୁ ହେବ, ସେ ବାବଦରେ କିଛି କହି ନାହିଁ ଜିଓ।
ସୂଚନାଯୋଗ୍ୟ, ଟ୍ରାଇ ୨୦୧୭ରେ ଆଇୟୁସି (ଇଣ୍ଚରକନେକ୍ଟ ୟୁଜେସ ଚାର୍ଜ) ୧୪ ପଇସାରୁ ୬ ପଇସା କରିଥିଲା। ସେତେବେଳେ ଚଳିତ ବର୍ଷ ଶେଷ ସୁଦ୍ଧା ଆଇୟୁସି ମାଗଣା ହୋଇପାରେ ବୋଲି କହିଥିଲା।
ଦେଶର ଅନ୍ୟ ଟେଲିକମ କମ୍ପାନୀ ଏୟାରଟେଲ୍, ଭୋଡ଼ାଫୋନ୍-ଆଇଡିଆ ଏହି ଇଣ୍ଚରକନେକ୍ଟ ୟୁଜେସ ଚାର୍ଜ ଗ୍ରାହକଙ୍କ ପାଖରୁ ନେବେ ନାହିଁ ବୋଲି ଗତକାଲି ସ୍ପଷ୍ଟ କରିଛନ୍ତି।
ଜିଓ ପକ୍ଷରୁ ୯ ତାରିଖରେ ଆଇୟୁସି ଚାର୍ଜ ବାବଦରେ ଘୋଷଣା ହେବା ପରେ ଅନ୍ୟ ନେଟଓ୍ୱର୍କ ସହ କଥା ହେବା ପାଇଁ ଟପ୍ ଅପ ଘୋଷଣା କରିଛି। ୧୦ ଟଙ୍କାରେ ଅନ୍ୟ ନେଟୱର୍କକୁ ୧୨୪ ମିନିଟ୍ ପର୍ଯ୍ୟନ୍ତ କଲ୍ ଓ ଗୋଟିଏ ଜିବି ଡାଟା ମିଳିବ। ସେହିପରି ୨୦ ଟଙ୍କାରେ ୨୪୯ ମିନିଟ୍ ପର୍ଯ୍ୟନ୍ତ କଲ୍ ଓ ୨ ଜିବି ଡାଟା ମିଳିବ। ୫୦ ଟଙ୍କିଆ ରିଚାର୍ଜରେ ୬୫୬ ମିନିଟ୍ ପର୍ଯ୍ୟନ୍ତ କଲ୍ ଓ ୫ ଜିବି ଡାଟା ଓ ୧୦୦ ଟଙ୍କିଆ ରିଚାର୍ଜରେ ୧୩୬୨ ମିନିଟ୍ ପର୍ଯ୍ୟନ୍ତ ଅଲଗା ନେଟୱର୍କକୁ କଲ୍ ଓ ୧୦ ଜିବି ଡାଟା ସୁବିଧା ମିଳିବ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
