ନୂଆଦିଲ୍ଲୀ: ହରିଆଣାର ପାଲୱାଲଠାରେ ଜଣେ ବ୍ୟକ୍ତିଙ୍କୁ ଆଜି ଗୋରୁ ଚୋରାଚାଲାଣ ଅଭିଯୋଗରେ ପିଟିପିଟି ହତ୍ୟା କରାଯାଇଛି। ମୃତ ବ୍ୟକ୍ତି ବାହାରୋଲ ଗାଁରୁ କିଛି ଗୃହପାଳିତ ପଶୁ ଏବଂ ଗାଈ ଚୋରି କରୁଥିବା ଅଭିଯୋଗ ହୋଇଛି।
ଏହାକୁ କେନ୍ଦ୍ର କରି ସ୍ଥାନୀୟ ଅଞ୍ଚଳର ୩ ଜଣ ଲୋକ ଉକ୍ତ ବ୍ୟକ୍ତିଙ୍କ ହାତ ଗୋଡ଼ ବାନ୍ଧି ମାଡ଼ ମାରିଥିଲେ। ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା।
ମାଡ଼ ମାରିଥିବା ବ୍ୟକ୍ତି ଜଣଙ୍କ ଅଭିଯୋଗ କରିଛନ୍ତି, ପ୍ରାଣ ହରାଇଥିବା ବ୍ୟକ୍ତି ଓ ତାଙ୍କର ଦୁଇ ଜଣ ସହଯୋଗୀ ଗୁହାଳରୁ ଚୋରି କରିବାକୁ ଉଦ୍ୟମ କରୁଥିଲେ। ଦୁଇ ଜଣ ଘଟଣାସ୍ଥଳରୁ ଚମ୍ପଟ ମାରିଥିବା ବେଳେ ଜଣେ ଧରା ପଡ଼ିଥିଲା।
ପୁଲିସ୍ ଏକ ମାମଲା ରୁଜୁ କରିବା ସହ ତଦନ୍ତ ଆରମ୍ଭ କରିଛି।