ହାଇଦ୍ରାବାଦ: କରୋନାରେ ଆକ୍ରାନ୍ତ ହୋଇ ପ୍ରାଣ ହରାଉଥିବା ମୃତଦେହ ଗୁଡ଼ିକୁ କେମିତି ସମ୍ମାନ ଜଣାଯାଉଛି, ତା’ର ଏକ ଜ୍ୱଳନ୍ତ ଉଦାହରଣ ସାମ୍ନାକୁ ଆସିଛି। କରୋନାରେ ଆକ୍ରାନ୍ତ ହୋଇ ପ୍ରାଣ ହରାଇଥିବା ୫୦ରୁ ଅଧିକ ଲୋକଙ୍କ ମୃତଦେହକୁ ଗୋଟିଏ ସ୍ଥାନରେ ଅନ୍ତିମ ସଂସ୍କାର କରାଯିବା ଘଟଣାର ଭିଡିଓ ସାମ୍ନାକୁ ଆସିଛି।
ହାଇଦ୍ରାବାଦର ଇଏସ୍ଆଇ ହସ୍ପିଟାଲର ଶଶ୍ମାନରେ ଏହା ଘଟିଛି। ଏହାକୁ ନେଇ ବିବାଦ ଉପୁଜିବାରୁ ତେଲେଙ୍ଗାନା ମେଡିକାଲ ଏଡୁକେସନ ନିର୍ଦ୍ଦେଶକ ଡା କେ ରମେଶ ରେଡ୍ଡୀ ପରିବହନ ଅଭାବରୁ ଏଭଳି କରାଯାଇଥିବା ସଫେଇ ଦେଇଛନ୍ତି।
କଂଗ୍ରେସ ବିଧାୟକ ସୀଥାକ୍କା ଟ୍ୱିଟ କରି ଗୋଟିଏ ଭିଡିଓ ପୋଷ୍ଟ କରିଥିଲେ। ଏଥିରେ ଏକାଧିକ ଶବର ଏକାଠି ଅନ୍ତିମ ସଂସ୍କାର କରାଯାଉଥିବାର ଦୃଶ୍ୟ ରହିଥିଲା। ସେ କହିଥିଲେ ଯେ ଇଏସଆଇ ଶଶ୍ମାନରେ ୩୦ରୁ ଅଧିକ ଶବକୁ ଏକାଠି ଅନ୍ତିମ ସଂସ୍କାର କରାଯାଇଛି। କେସିଆର ନେତୃତ୍ୱାଧୀନ ସରକାର ରାଜ୍ୟରେ କରୋନା ଜନିତ ମୃତ୍ୟୁସଂଖ୍ୟାକୁ ଲୁଚାଇବା ପାଇଁ ଏଭଳି କରିଥିବା ସେ ଅଭିଯୋଗ କରିଥିଲେ।
https://twitter.com/i/status/1285978471043182592
ଏକାଠି ଏତେ ସଂଖ୍ୟକ ମୃତଦେହକୁ ଅନ୍ତିମ ସଂସ୍କାର କରାଯିବା ଘଟଣାକୁ ତେଲେଙ୍ଗାନା ସ୍ୱାସ୍ଥ୍ୟ ବିଭାଗ ସ୍ୱୀକାର କରିଛି। ହେଲେ ସରକାର କୌଣସି ପ୍ରକାରର କରୋନା ମୃତ୍ୟୁରେ ତ୍ରୁଟିଗତ ତଥ୍ୟ ଦେଉ ନଥିବା ବିଭାଗ ପକ୍ଷରୁ କୁହାଯାଇଛି।
ଡା ରମେଶ କହିଛନ୍ତି, “୫୦ରୁ ଅଧିକ କରୋନା ଆକ୍ରାନ୍ତଙ୍କ ମୃତଦେହକୁ ସଂସ୍କାର କରାଯାଇଛି। ତେବେ ଏମାନେ ସମସ୍ତେ ଗୋଟିଏ ଦିନରେ ପ୍ରାଣ ହରାଇ ନଥିଲେ। ଦୁଇ-ତିନି ମଧ୍ୟରେ ପ୍ରାଣ ହରାଇଥିବା ଲୋକଙ୍କୁ ଏଭଳି ସଂସ୍କାର କରାଯାଇଛି। ମୃତଦେହ ନେବାକୁ ପରିବହନ ବ୍ୟବସ୍ଥାର ଅଭାବ ହେବାରୁ ଏପରି କରାଯାଇଛି।”