ନୂଆଦିଲ୍ଲୀ: ସାଧାରଣ ନିର୍ବାଚନରେ କଂଗ୍ରେସ ଶାସିତ ରାଜ୍ୟ ମଧ୍ୟପ୍ରଦେଶର ୨୯ଟି ଲୋକସଭା ଆସନରୁ ବିଜେପି ୨୮ଟିରେ ବିଜୟୀ ହୋଇଛି। ଏଭଳି ଶୋଚନୀୟ ପରାଜୟ ପାଇଁ ମଧ୍ୟପ୍ରଦେଶ କଂଗ୍ରେସ ସଭାପତି ତଥା ମୁଖ୍ୟମନ୍ତ୍ରୀ କମଲନାଥଙ୍କୁ ଦାୟୀ କରିଛନ୍ତି ଦଳର ସଦସ୍ୟ। ଗତକାଲି ମୁଖ୍ୟମନ୍ତ୍ରୀ କମଲନାଥ ପରାଜୟର ସମୀକ୍ଷା କରୁଥିବା ବେଳେ କିଛି କଂଗ୍ରେସ ବିଧାୟକ କମଲନାଥଙ୍କ ଦଳୀୟ ପଦବୀକୁ ବିରୋଧ କରିଛନ୍ତି। ଏମିତିକି ସେମାନେ ୭୨ ବର୍ଷୀୟ କମଲନାଥଙ୍କୁ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବାକୁ ଚାପ ପକାଉଥିବା ଚର୍ଚ୍ଚା ହେଉଛି।
ଗୁନ୍ନା ଲୋକସଭା ଆସନରୁ କଂଗ୍ରେସ ପ୍ରାର୍ଥୀ ଜ୍ୟୋତିରାଦିତ୍ୟ ସିନ୍ଧିଆ ପରାସ୍ତ ହେବା ପରେ ଦଳର କିଛି ନେତା ଏବେ କମଲନାଥଙ୍କ ସ୍ଥାନରେ ଜ୍ୟୋତିରାଦିତ୍ୟଙ୍କୁ ଆଣିବାକୁ ଦାବି କରିଛନ୍ତି। ଗତବର୍ଷ ବିଧାନସଭା ନିର୍ବାଚନ ପରେ ଲୋକସଭା ନିର୍ବାଚନରେ କଂଗ୍ରେସ ଭଲ କରିବ ବୋଲି କମଲନାଥ କହିଥିଲେ। ହେଲେ ଦଳର ଶୋଚନୀୟ ପରାଜୟ ହୋଇଥିବାରୁ କମଲନାଥ ପିସିସି ସଭାପତି ପଦବୀରୁ ଇସ୍ତଫା ଦେବା ଦରକାର ବୋଲି କଂଗ୍ରେସ ସଦସ୍ୟ ଦାବି କରିଛନ୍ତି। କମଲନାଥ ପିସିସି ସଭାପତି ପଦରୁ ଇସ୍ତଫା ଦେବେ ବୋଲି ସୂଚନା ମିଳିଥିଲେ ହେଁ ଏଯାଏ ଦେଇନାହାନ୍ତି।
ଅନ୍ୟପଟେ ମଧ୍ୟପ୍ରଦେଶ ବିଧାନସଭା ନିର୍ବାଚନରେ କଂଗ୍ରେସ ବିଏସପି ବିଧାୟକଙ୍କ ସମର୍ଥନରେ ସରକାର ଗଢ଼ିଛି। ଏବେ ଏହି ବିଏସପି ବିଧାୟକ ଜ୍ୟୋତିରାଦିତ୍ୟଙ୍କୁ ସରକାରର ଦାୟିତ୍ୱ ଦିଆଯାଉ ବୋଲି ଦାବି କରିଛନ୍ତି। ନହେଲେ ସମର୍ଥନ ପ୍ରତ୍ୟାହାର କରିନେବେ ବୋଲି ସେ ଧମକ ଦେଉଥିବା ଜଣାପଡ଼ିଛି।