ନୂଆଦିଲ୍ଲୀ: ବିହାରରେ ପୁଣି ଚାଲିବ ଏନଡିଏ ରାଜ୍। କ୍ଷମତାକୁ ଫେରିଲା ବିଜେପି-ଜେଡିୟୁ ମେଣ୍ଟ ସରକାର। ବିଜେପି ସମର୍ଥନରେ ଆଜି ମୁଖ୍ୟମନ୍ତ୍ରୀ ଭାବେ ଶପଥ ନେବେ ନୀତୀଶ କୁମାର। ଦିନ ୧୦ଟା ବେଳେ ଶପଥ ଗ୍ରହଣ ଉତ୍ସବର ଆୟୋଜନ କରାଯାଇଛି। ଶପଥ ଗ୍ରହଣ ସମାରୋହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଯୋଗ ଦେବାର ସମ୍ଭାବନା ରହିଛି। ସୁଶୀଲ ମୋଦି ପୁଣି ଉପ-ମୁଖ୍ୟମନ୍ତ୍ରୀ ଭାବେ ଶପଥ ନେବା ସ୍ପଷ୍ଟ ସୂଚନା ମିଳିଛି।
ନୂଆ ସରକାରର ଅନ୍ୟ ମନ୍ତ୍ରୀମାନେ ୨ଦିନ ମଧ୍ୟରେ ବହୁମତ ପ୍ରମାଣ ହେବା ପରେ ଶପଥ ନେବେ। ବିହାରରେ ଜେଡିୟୁର ବିଧାୟକଙ୍କ ସଂଖ୍ୟା ୭୧ ଥିବା ବେଳେ ବିଜେପି ପାଖରେ ଅଛନ୍ତି ୫୩ ବିଧାୟକ। ବହୁମତ ପାଇଁ ୧୨୨ ବିଧାୟକ ଆବଶ୍ୟକ ରହିଛି।
ଲାଲୁଙ୍କ ଆରଜେଡି ସହ ମହାମେଣ୍ଟ ଛାଡ଼ି ଗତକାଲି ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ ନୀତୀଶ। ଏହା ପରେ ତୁରନ୍ତ ନୂଆ ସରକାର ଗଠନ ପାଇଁ ବିଜେପି ସମର୍ଥନ ଜଣାଇଥିଲା। ଏପରିକି ରାତାରାତି ରାଜ୍ୟପାଳ କେଶରୀନାଥ ତ୍ରିପାଠୀଙ୍କୁ ଭେଟି ନୀତୀଶ କୁମାର ଓ ବିଜେପି ନେତା ସୁଶୀଲ ମୋଦି ସରକାର ଗଠନ ପାଇଁ ଦାବି ଜଣାଇଥିଲେ।