ନୂଆଦିଲ୍ଲୀ: କ୍ରମାଗତ ତୈଳ ଦରବୃଦ୍ଧିକୁ ନେଇ ସମଗ୍ର ଦେଶରେ ପ୍ରବଳ ଜନଅସନ୍ତୋଷ ତେଜିବା ପରେ ଏହାକୁ ପ୍ରସମିତ କରିବା ପାଇଁ କେନ୍ଦ୍ର ସରକାର ପ୍ରୟାସ କରିଛନ୍ତି। ପେଟ୍ରୋଲ ଏବଂ ଡିଜେଲ ଦର ହ୍ରାସ ନେଇ ଆଜି ସରକାର ଘୋଷଣା କରିଛନ୍ତି। ପେଟ୍ରୋଲ ଏବଂ ଡିଜେଲ ଲିଟର ପ୍ରତି ୨ ଟଙ୍କା ହ୍ରାସ କରାଯାଇଛି। ତୈଳ ଉପରୁ ଉତ୍ପାଦ ଶୁଳ୍କ ହ୍ରାସ ପାଇଁ ସରକାର ନିଷ୍ପତ୍ତି ନେଇଥିବାରୁ ଦର କମିଛି।
ନୂଆ ଦର ଆଜି ମଧ୍ୟ ରାତ୍ରରୁ ଲାଗୁ ହେବ। କୁହାଯାଉଛି ୨୦୧୪ ପରେ କେନ୍ଦ୍ର ସରକାର ତୈଳ ଉପରେ ୧୨୬ ପ୍ରତିଶତ ଉତ୍ପାଦ ଶୁଳ୍କ ବୃଦ୍ଧି କରିଛନ୍ତି। ଆଉ ଡିଜେଲ ଉପରେ ୩୭୪ ପ୍ରତିଶତ ଉତ୍ପାଦ ଶୁଳ୍କ ବୃଦ୍ଧି କରିଛନ୍ତି। ଭୁବନେଶ୍ୱରରେ ଆଜି ପେଟ୍ରୋଲ ଲିଟରପ୍ରତି ୬୯.୭୧ ଟଙ୍କା ରହିଛି ଏବଂ ଡିଜେଲ ୬୩.୩୮ ଟଙ୍କା ରହିଛି। କିଛି ଦିନତଳେ ତେଲ ଦରକୁ ନେଇ ବିଜେଡି ପକ୍ଷରୁ ରାଜ୍ୟରେ ହରତାଳ କରାଯାଇଥିଲା। ଏହାକୁ ନେଇ କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ପ୍ରତିକ୍ରିୟା ରଖିଥିଲେ। ତେଲ ଦର କମିବା ନେଇ ସେ ଆଶ୍ୱସନା ଦେଇଥିଲେ।