ଆମେଠି: ଭୋଟରଙ୍କୁ ନିଜ ଆଡ଼କୁ ଆକୃଷ୍ଟ କରିବାକୁ ବିଜେପି ଉତ୍ତର ପ୍ରଦେଶର ଆମେଠିରେ ଟଙ୍କା, ଶାଢ଼ୀ ଓ ଜୋତା ବାଣ୍ଟୁଛି ବୋଲି ଆଜି କଂଗ୍ରେସ ନେତ୍ରୀ ପ୍ରିୟଙ୍କା ଗାନ୍ଧି ଭଦ୍ରା ଅଭିଯୋଗ କରିଛନ୍ତି।
ଗଣମାଧ୍ୟମକୁ ସୂଚନା ଦେଇ ପ୍ରିୟଙ୍କା କହିଛନ୍ତି, “ବିଜେପି ସର୍ବସମ୍ମୁଖରେ ଟଙ୍କା, ଶାଢ଼ୀ ଓ ଜୋତା ବାଣ୍ଟି ନିର୍ବାଚନ ଲଢ଼ିବାକୁ ଚେଷ୍ଟା କରୁଛି। ଆମେଠିର ଲୋକମାନେ କେବେ କାହା ଆଗରେ ହାତ ପତେଇ ନାହାନ୍ତି। ମୁଁ ୧୨ ବର୍ଷର ହୋଇଥିବା ବେଳେ ଏଠାକୁ ଆସୁଛି।
ଆମେଠି ଓ ରାଏବରେଲୀର ଲୋକମାନେ ଭାରି ସ୍ୱାଭିମାନୀ। ଆମେଠିରେ ଟଙ୍କା ବାଣ୍ଟି ବିଜେପି ଜିତି ପାରିବ ନାହିଁ। ଏଠାରେ କେବଳ ଶିକ୍ଷା, ବେକାରୀ ଓ ସ୍ୱାସ୍ଥ୍ୟ ହେଉଛି ୩ଟି ପ୍ରସଙ୍ଗ। ଜାତୀୟତାବାଦର ଅର୍ଥ ଲୋକଙ୍କ ସମସ୍ୟାର ସମାଧାନ କରିବା। କିନ୍ତୁ ଏଠାରେ କ୍ଷମତାସୀନ ସରକାର କିଛି ଶୁଣୁନାହାନ୍ତି। ଲୋକମାନେ ସେମାନଙ୍କ ସମସ୍ୟା କଥା କହିଲେ ସେମାନଙ୍କ ସ୍ୱରକୁ ଚାପି ଦିଆଯାଉଛି। ଏହା ଗଣତନ୍ତ୍ର କି ଜାତୀୟତାବାଦ ନୁହେଁ।”
ବିଜେପି ଏଠାରେ ସ୍ମୃତି ଇରାନୀଙ୍କୁ ପ୍ରାର୍ଥୀ କରିଛି। ଏଠାରେ ତାଙ୍କର ଲଢ଼େଇ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧିଙ୍କ ସହ ହେବ।