ନୂଆଦିଲ୍ଲୀ: କଂଗ୍ରେସ ସଭାପତି ପଦ ନିର୍ବାଚନ ଲାଗି ଆଜି ନାମାଙ୍କନ ପତ୍ର ଦାଖଲ କରିଛନ୍ତି ରାହୁଲ ଗାନ୍ଧି। ଦଳୀୟ କାର୍ଯ୍ୟାଳୟରେ ବରିଷ୍ଠ ନେତାଙ୍କ ଉପସ୍ଥିତିରେ ରାହୁଲ ପ୍ରାର୍ଥୀପତ୍ର ଦାଖଲ କରିଛନ୍ତି। କଂଗ୍ରେସ ସଭାପତି ପଦ ଲାଗି ରାହୁଲ ଏକମାତ୍ର ପ୍ରାର୍ଥୀ ହେବା ଅନୁମାନ କରାଯାଉଛି। ଯଦି ଦଳରୁ ଆଉ କିଏ ପ୍ରାର୍ଥି ହୁଅନ୍ତି ତେବେ ୧୬ ତାରିଖରେ ନିର୍ବାଚନ ହେବ। ନଚେତ ରାହୁଲ ନିର୍ଦ୍ୱନ୍ଦ୍ୱରେ କଂଗ୍ରେସ ସଭାପତି ଭାବେ ନିର୍ବାଚିତ ହେବେ।
୨୦୧୩ରୁ କଂଗ୍ରେସର ଉପସଭାପତି ଦାୟିତ୍ୱ ତୁଲାଇ ଆସୁଥିବା ରାହୁଲ ତାଙ୍କ ମାଆ ସୋନିଆ ଗାନ୍ଧିଙ୍କ ସ୍ଥାନ ନେବେ। ସୋନିଆ ୧୯୯୮ ମସିହାରୁ ଏ ପର୍ଯ୍ୟନ୍ତ କଂଗ୍ରେସ ସଭାପତି ଥିଲେ।
ରାହୁଲଙ୍କ ଲାଗି ଓଡ଼ିଶାରୁ ପ୍ରସ୍ତାବକ ସାଜିଛନ୍ତି ୧୦ ଜଣ ନେତା। ପିସିସି ସଭାପତି ପ୍ରସାଦ ହରିଚନ୍ଦନ, ବିରୋଧୀ ଦଳ ନେତା ନରସିଂହ ମିଶ୍ରଙ୍କ ସମେତ ୧୦ ଜଣ ନେତା ଓଡ଼ିଶା ଆସିଥିବା କଂଗ୍ରେସର ସାଂଗଠନିକ ନିର୍ବାଚନ ପ୍ରକ୍ରିୟାର ଅତିରିକ୍ତ ନିର୍ବାଚନ ଅଧିକାରୀ ଜୟଶଙ୍କର ପାଠକଙ୍କ ନିକଟରେ ପ୍ରସ୍ତାବକ ଭାବେ ସ୍ୱାକ୍ଷର କରିଛନ୍ତି।