ନୂଆଦିଲ୍ଲୀ: ରାମମନ୍ଦିର ନିର୍ମାଣକୁ କୌଣସି ସରକାର ଅଣଦେଖା କରିପାରିବେ ନାହିଁ। ବୁଧବାର ଏ କଥା କହିଛନ୍ତି ବିଜପିର ରାଜ୍ୟସଭା ସାଂସଦ ବିନୟ କଟିୟାର।
ସେ କହିଛନ୍ତି, ରାମମନ୍ଦିର ବିଷୟରେ କୌଣସି ନିଷ୍ପତ୍ତି ନେବା ନରେନ୍ଦ୍ର ମୋଦି ସରକାର ପାଇଁ ବଡ କାମ ନୁହେଁ। ରାମମନ୍ଦିର ପ୍ରସଙ୍ଗ ସହିତ ଜଡ଼ିତ ସମସ୍ତ ପକ୍ଷଙ୍କୁ ସରକାରୀ ଅଧିକାରୀମାନେ ଏକାଠି ଡାକି ବସାଇପାରିବେ ଓ ଆଲୋଚନା କରିପାରିବେ।
ଅଯୋଧ୍ୟାରେ ରାମ ମନ୍ଦିର ନିର୍ମାଣ କରାଯାଇପାରିବ ନାହିଁ ବୋଲି ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା କହିବାର କିଛି ଦିନ ପରେ କଟିୟାର ଏଭଳି ମନ୍ତବ୍ୟ ଦେଇଛନ୍ତି। ଅମିତ ଶାହ କହିଥିଲେ, ଅଯୋଧ୍ୟାରେ ରାମ ମନ୍ଦିର ନିର୍ମାଣ ହେଉଛି ମୁଖ୍ୟ ପ୍ରସଙ୍ଗ। କିନ୍ତୁ ଏହା କରାଯାଇପାରିବ ନାହିଁ। କାରଣ ଏଥିପାଇଁ ସମ୍ବିଧାନ ଅନୁଯାୟୀ ସଂସଦରେ ବିଜପି ୩୭୦ ସଦସ୍ୟ ଆବଶ୍ୟକ କରୁଛି।
ଗତ ମାସରେ କେନ୍ଦ୍ର ଗୃହ ମନ୍ତ୍ରୀ ରାଜନାଥ ସିଂହ ମଧ୍ୟ କହିଥିଲେ ଯେ ରାମ ମନ୍ଦିର ନିର୍ମାଣ ପାଇଁ ସରକାର ଆଇନ ଆଣି ପାରିବେ ନାହିଁ। କାରଣ ରାଜ୍ୟସଭାରେ ଏନଡିଏର ସଂଖ୍ୟାଗରିଷ୍ଠତା ନାହିଁ।