ନୂଆଦିଲ୍ଲୀ: ଆଜି କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରୀ ସ୍ମୃତି ଇରାନୀ ସଂଖ୍ୟାଲଘୁ କଲ୍ୟାଣ ମନ୍ତ୍ରଣାଳୟର ଅତିରିକ୍ତ ଦାୟିତ୍ୱ ପାଇଛନ୍ତି। ଏହା ସହିତ ବେସାମରିକ ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆଙ୍କୁ ଇସ୍ପାତ ମନ୍ତ୍ରଣାଳୟର ଅତିରିକ୍ତ ଦାୟିତ୍ୱ ଦିଆଯାଇଛି। ମୁଖକ୍ତାର ଅବ୍ବାସ ନକଭି ଓ ଆରସିପି ସିଂହ ଦୁଇ ମନ୍ତ୍ରଣାଳୟ ପଦରୁ ଇସ୍ତଫା ଦେବା ପରେ ଏହି ମନ୍ତ୍ରଣାଳୟାର ଅତିରିକ୍ତ ଦାୟିତ୍ୱ ବଣ୍ଟନ ହୋଇଛି। ଆମିଠିରେ ଲୋକସଭା ନିର୍ବାଚନରେ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ପରାସ୍ତ କରିବା ପରେ ସ୍ମୃତି ଇରାନୀ ସଂସଦରେ ପହଞ୍ଚିଥିଲେ। ଏଥି ସହିତ ଜ୍ୟୋତିରାଦିତ୍ୟ ସିନ୍ଧିଆ ମଧ୍ୟପ୍ରଦେଶର ବିଜେପିର ରାଜ୍ୟସଭା ସାଂସଦ ଅଟନ୍ତି।
ସୂଚନା ଥାଉକି, ଆଜି ମୁଖକ୍ତାର ଅବ୍ବାସ ନକଭି ଇସ୍ତଫା ଦେଇଛନ୍ତି। ସେ ସଂଖ୍ୟାଲଘୁ ବ୍ୟାପାର ବିଭାଗ ପରିଚାଳନା କରୁଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭେଟି ନାକଭି ଇସ୍ତଫା ଦେଇଛନ୍ତି। ନାକଭି ଆଜି ତାଙ୍କର ଶେଷ କ୍ୟାବିନେଟ ବୈଠକରେ ଯୋଗ ଦେଇଥିଲେ। ସେ ଜଣେ ଭଲ ମନ୍ତ୍ରୀ ଭାବେ କାମ କରିଥିବା ଏହି ବୈଠକରେ ପ୍ରଧାନମନ୍ତ୍ରୀ ମୋଦୀ ପ୍ରଶଂସା କରି କହିଥିଲେ।
ଏହାସହିତ ଇସ୍ପାତ ମନ୍ତ୍ରୀ ଆରସିପି ସିଂ ମଧ୍ୟ ଆଜି ଶେଷ କ୍ୟାବିନେଟ ବୈଠକରେ ଯୋଗ ଦେଇଥିଲେ। ଏହି ବୈଠକରେ ପ୍ରଧାନମନ୍ତ୍ରୀ ମୋଦୀ ଉଭୟ କେନ୍ଦ୍ର ମନ୍ତ୍ରୀଙ୍କୁ ବିଦାୟ ଦେବାବେଳେ କହିଛନ୍ତି ଯେ ମନ୍ତ୍ରୀ ଥିବାବେଳେ ଦେଶର ବିକାଶରେ ଉଭୟଙ୍କ ଅବଦାନ ରହିଛି।
ଏହି ଦୁଇ ମନ୍ତ୍ରୀଙ୍କ ରାଜ୍ୟସଭା କାର୍ଯ୍ୟକାଳ ଜୁଲାଇ ୭ ରେ ଶେଷ ହେବ। ମାତ୍ର ଏଥର ଆଉ ଆଗକୁ ବିଜେପି ନକଭିଙ୍କୁ ରାଜ୍ୟସଭାକୁ ପଠାଇ ନାହିଁ। ଉପରାଷ୍ଟ୍ରପତି ନିର୍ବାଚନ ନେଇ ଆଲୋଚନା ଚାଲିଥିବା ବେଳେ ଦଳ ତାଙ୍କୁ ଏକ ବଡ଼ ଦାୟିତ୍ୱ ଦେଇପାରେ ବୋଲି ବିଶ୍ୱାସ କରାଯାଉଛି।
ମୋଦୀ କ୍ୟାବିନେଟରେ ଜେଡିୟୁ କୋଟାରୁ ମନ୍ତ୍ରୀ ହୋଇଥିବା ଆରସିପି ସିଂଙ୍କ ଗୁରୁବାର ମଧ୍ୟ ରାଜ୍ୟସଭାର କାର୍ଯ୍ୟକାଳ ଶେଷ ହେବାକୁ ଯାଉଛି। ଯଦିଓ ସେ ସାଂସଦ ନ ହୋଇ ୬ ମାସ ମନ୍ତ୍ରୀ ରହିପାରିବେ, କିନ୍ତୁ ପ୍ରଧାନମନ୍ତ୍ରୀ ମୋଦୀ କ୍ୟାବିନେଟରୁ ତାଙ୍କୁ ବିଦାୟ ଦିଆଯାଇଛି।