ପୁଲୱାମା:ଗତ ଫେବୃଆରୀ ୧୪ ତାରିଖରେ ଜମ୍ମୁକଶ୍ମୀର ପୁଲୱାମାରେ ସିଆର୍ପିଏଫ୍ ଯବାନଙ୍କ ଉପରେ ଆତ୍ମଘାତୀ ବିସ୍ଫୋରଣ ହୋଇଥିଲା। ଏଥିରେ ୪୦ ଜଣ ଯବାନ ସହିଦ୍ ହୋଇଥିଲେ। ତେବେ ଏହି ଘଟଣାକୁ ସାରା ଦେଶ ନିନ୍ଦା କରିଥିବା ବେଳେ ସୋଶାଲ ମିଡିଆରେ ଅନେକ ପ୍ରକାର ସତ-ମିଛ ଖବର ପ୍ରସାରିତ ହେବାରେ ଲାଗିଛି। ପୁଲୱାମା ବିସ୍ଫୋରଣରେ ସେନା ତାଲିମ ପ୍ରାପ୍ତ ୧୩ଟି ସ୍ନିଫର ଡଗ୍ଙ୍କ ମୃତ୍ୟୁ ଘଟିଥିବା ସୋଶାଲ ମିଡିଆରେ ଏକ ଗୁଜବ ପ୍ରଚାର ହୋଇଥିଲା। ୪୦ ଜଣ ଯବାନଙ୍କ ସହିତ ୧୩ଟି ସେନା କୁକୁର ମଧ୍ୟ ଏହି ବିସ୍ଫୋରଣରେ ପ୍ରାଣ ହରାଇଥିବା ପ୍ରଚାର ହୋଇଥିଲା। ତେବେ ଏହି ଖବର ମିଛ ବୋଲି ସିଆରପିଏଫ୍ ପକ୍ଷରୁ ଜାତୀୟ ଗଣମାଧ୍ୟମ ‘ଦ କ୍ୱିଣ୍ଟ’କୁ ସୂଚନା ଦିଆଯାଇଥିବା ଉକ୍ତ ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଛି।
ସିଆର୍ପିଏଫ୍ ଅଫିସ୍ ପକ୍ଷରୁ ‘ଦ କ୍ୱିଣ୍ଟ’କୁ ଦିଆଯାଇଥିବା ସୂଚନା ଅନୁଯାୟୀ ଆକ୍ରମଣରେ କୌଣସି ସେନା କୁକୁର ପ୍ରାଣ ହରାଇ ନାହାନ୍ତି। ଏହା ଏକ ମିଛ ଖବର। ଏଥିରେ କେବଳ ୪୦ ସିଆପିଏଫ୍ ଯବାନମାନେ ହିଁ ସହିଦ୍ ହୋଇଛନ୍ତି। ତେବେ ସିଆର୍ପିଏଫ୍ ଅଫିସ୍ ପକ୍ଷରୁ ଏହି ସୂଚନା ଦିଆଯିବା ପରେ ଏହି ମିଛ ଖବରକୁ ପୋଷ୍ଟ କରିଥିବା ୟୁଜର୍ ଅଂଶୁ ଏସ୍ ଭାସ୍ୱାମୀ ତାଙ୍କ ପୋଷ୍ଟକୁ ଡିଲିଟ୍ କରି ଦେଇଛନ୍ତି।
ଘଟଣା ଅନୁସାରେ ଜମ୍ମୁକଶ୍ମୀରର ପୁଲୱାମା ଜିଲ୍ଲାରୁ ଗତ ଗୁରୁବାର ସିଆର୍ପିଏଫ୍ର ୨୫୪୭ ଜଣ ଯବାନ ଟ୍ରେନିଂ ସାରି ଫେରୁଥିଲେ। ୭୮ଟି ବସ୍ରେ ଏହି ଯବାନମାନେ ରହିଥିଲେ। ଏହି ସମୟରେ ଆତଙ୍କବାଦୀମାନେ ଏକ ବିସ୍ଫୋରକ ଭର୍ତ୍ତି ଗାଡ଼ିକୁ ଯବାନଙ୍କ ବସ ସହ ଧକ୍କା କରି ଭୟଙ୍କର ବିସ୍ଫୋରଣ ଘଟାଇଥିଲେ। ଏଥିରେ ୪୦ ଜଣ ଯବାନ ସହିଦ୍ ହୋଇଥିଲେ।
ତେବେ ସ୍ନିଫର ଡଗ୍ ହେଉଛନ୍ତି ବିଏସ୍ଏଫ୍ ଯବାନଙ୍କ ସାଥୀରେ ରହି ସୀମାନ୍ତରେ ଦେଶକୁ ସୁରକ୍ଷା ଦେଉଥିବା ଉନ୍ନତ ପ୍ରଜାତିର କୁକୁର। ଏମାନଙ୍କୁ ବିଏସ୍ଏଫ୍ ଏକାଡେମିସ୍ଥିତ ଜାତୀୟ କୁକୁର ପ୍ରଶିକ୍ଷଣ କେନ୍ଦ୍ରରୁ(ଏନ୍ଟିସିଡି) ବିଧିବଦ୍ଧ ତାଲିମ ଦିଆଯାଇଥାଏ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
