ନୂଆଦିଲ୍ଲୀ: ଆସନ୍ତା ଜାନୁଆରୀ ୪ ତାରିଖରୁ ଅଯୋଧ୍ୟା ଶ୍ରୀରାମ ଜନ୍ମଭୂମି-ବାବ୍ରି ମସଜିଦ୍ ମାମଲାର ଶୁଣାଣି ଆରମ୍ଭ କରିବେ ସୁପ୍ରିମ୍କୋର୍ଟ। ପ୍ରଧାନ ବିଚାରପତି ଜଷ୍ଟିସ୍ ରଞ୍ଜନ ଗୋଗୋଇଙ୍କ ଅଧ୍ୟକ୍ଷତାରେ ଗଠିତ ଏକ ଖଣ୍ଡପୀଠ ଏହାର ଶୁଣାଣି କରିବେ।
ଅକ୍ଟୋବର ମାସରେ ୪ ମିନିଟ୍ର ଏହି ମାମଲାର ଶୁଣାଣି କଲା ବେଳେ ସର୍ବୋଚ୍ଚ ନ୍ୟାୟାଳୟ ଏହାର ଜରୁରୀ ଶୁଣାଣି କରିବାକୁ ସମ୍ମତ ହୋଇନଥିଲେ। କହିଥିଲେ, କୋର୍ଟର ଅନ୍ୟ ଗୁରୁତ୍ୱପୂର୍ଣ୍ଣ କାମ ମଧ୍ୟ ଅଛି। ଏହା ପରେ ରାମ ମନ୍ଦିର ଗଠନ ପାଇଁ ସରକାର ଅଧ୍ୟାଦେଶ ଆଣନ୍ତୁ ବୋଲି ହିନ୍ଦୁ ସଂଗଠନ ମାନେ ଶାସକ ଦଳ ବିଜେପି ଉପରେ ଚାପ ପ୍ରୟୋଗ ଆରମ୍ଭ କରିଥିଲେ।
ବିଜେପି ମତ ରଖି ଆସୁଛି ଯେ ସୁପ୍ରିମ୍କୋର୍ଟ ଏହି ପ୍ରସଙ୍ଗରେ ପ୍ରତିଦିନ ଶୁଣାଣି କରନ୍ତୁ। ଏହାଫଳରେ ଏହି ବିବାଦର ସମାଧାନ ଶୀଘ୍ର ସମ୍ଭବପର ହୋଇପାରିବ। ରାମ ମନ୍ଦିର ନିର୍ମାଣ ପ୍ରକ୍ରିୟାକୁ ତ୍ୱରାନ୍ୱିତ କରିବାପାଇଁ ହିନ୍ଦୁ ସଂଗଠନଙ୍କ ବ୍ୟତୀତ ବିଜେପିର ମେଣ୍ଟ ସହଯୋଗୀ ଶିବସେନା ମଧ୍ୟ ଅଯୋଧ୍ୟାରେ ଜନସମାବେଶ କରି ବିଜେପି ଉପରେ ଚାପ ପ୍ରୟୋଗ କରିଥିଲା।