ପାଟନା: ବିହାର ରାଜ୍ୟସଭା ଉପନିର୍ବାଚନ ପାଇଁ ନାମାଙ୍କନ ଭରିଛନ୍ତି ବିଜେପି ନେତା ତଥା ରାଜ୍ୟର ପୂର୍ବତନ ଉପମୁଖ୍ୟମନ୍ତ୍ରୀ ସୁଶୀଲ ମୋଦି। ଦିବଂଗତ କେନ୍ଦ୍ରମନ୍ତ୍ରୀ ତଥା ଏଲଜେପି ନେତା ରାମବିଳାଶ ପାଶଓ୍ୱାନଙ୍କ ଦେହାନ୍ତ ପରେ ଏହି ଆସନ ଖାଲି ପଡ଼ିଛି। ନିକଟରେ ନିର୍ବାଚନ କମିଶନ ଉପନିର୍ବାଚନ ନେଇ ବିଜ୍ଞପ୍ତି ପ୍ରକାଶ କରିଥିଲେ।
ସୁଶୀଲ ମୋଦି ଏନଡିଏ ପ୍ରାର୍ଥୀ ଭାବରେ ନାମାଙ୍କନ ଦାଖଲ କରିଛନ୍ତି। ସୁଶୀଲ ପ୍ରାର୍ଥୀପତ୍ର ଦାଖଲ କରିବା ବେଳେ ପାଖରେ ବିହାର ମୁଖ୍ୟମନ୍ତ୍ରୀ ତଥା ଜେଡିୟୁ ସୁପ୍ରିମୋ ନୀତୀଶ କୁମାର ଉପସ୍ଥିତ ଥିଲେ। ରାଜ୍ୟରେ ଏନଡିଏ ପାଖରେ ଅଧିକ ଆସନ ଥିବାରୁ ସୁଶୀଲ ମୋଦି ରାଜ୍ୟସଭାକୁ ନିର୍ବାଚିତ ହେବା ଏକ ପ୍ରକାର ନିଶ୍ଚିତ ବୋଲି କୁହାଯାଉଛି। ଡିସେମ୍ୱର ୧୪ରେ ଏହି ଆସନ ପାଇଁ ଉପନିର୍ବାଚନ ହେବ। ତେବେ ଆରଜେଡି, କଂଗ୍ରେସ ପ୍ରାର୍ଥୀ ଦେବ କି ନାହିଁ ଜଣାପଡ଼ିନି। ସେହିପରି ଏଲଜେପି ପାଖରେ ମାତ୍ର ଗୋଟିଏ ବିଧାୟକ ଆସନ ରହିଛି ତେଣୁ ସେ ପ୍ରାର୍ଥୀ ଦେଲେ ମଧ୍ୟ ଜିତିବ ନାହିଁ।