ଶ୍ରୀନଗର: ପୁଣି ଥରେ କଶ୍ମୀର ଉପତ୍ୟକାରେ ମାତିଛନ୍ତି ଆତଙ୍କବାଦୀ । ଜାମ୍ମୁ ଓ କାଶ୍ମୀର ଅନନ୍ତନାଗରେ ସିଆରପିଏଫ୍ ପେଟ୍ରୋଲିଂ ପାର୍ଟିକୁ ଆଜି ସକାଳୁ ଆକ୍ରମଣ କରିଥିଲେ ଆତଙ୍କବାଦୀ। ଏହି ଗୁଳିମାଡ଼ରେ ୨ ଜଣ ଯବାନ ସହିଦ ହୋଇଥିବା ବେଳେ ଜଣେ ଗୁରୁତର ଆହତ ହୋଇ ଡାକ୍ତରଖାନାରେ ଭର୍ତ୍ତି ହୋଇଛନ୍ତି । ଜଣେ ସାଧାରଣ ନାଗରିକ ମଧ୍ୟ ଆହତ ହୋଇଥିବା ସୂଚନା ମିଳିଛି ।
ଜାମ୍ମୁ ଓ କାଶ୍ମୀରରେ ଆତଙ୍କବାଦୀଙ୍କ ଟାର୍ଗେଟ୍ରେ ସୁରକ୍ଷାକର୍ମୀଙ୍କ ପାଟ୍ରୋଲିଂ ପାର୍ଟି । ସପ୍ତାହକ ମଧ୍ୟରେ ସିଆରପିଏଫ୍ ପାଟ୍ରୋଲିଂ ପାର୍ଟି ଉପରେ ହୋଇଛି ତୃତୀୟ ଥର ହମ୍ଲା। ପୁଲଓ୍ୱାମା ଓ ତ୍ରାଲ୍ ପରେ ଆଜି ସକାଳୁ ଅନନ୍ତନାଗରେ ଫୁଟିଛି ଗୁଳି। ସୂଚନା ଅନୁସାରେ, ଆଜି ସକାଳୁ ଅନନ୍ତନାଗର ଅଚବଳ ଚୌକରେ ହଠାତ୍ ଯବାନଙ୍କ ଉପରେ ଆକ୍ରମଣ କରିଥିଲେ । ପ୍ରାୟ ୧୦ ମିନିଟ୍ ଧରି ଉଭୟ ପକ୍ଷ ମଧ୍ୟରେ ଗୁଳିବିନିମୟ ହୋଇଥିଲା।
ଗତ ସପ୍ତାହକ ମଧ୍ୟରେ ସିଆପିଏଫ୍ ପାଟ୍ରୋଲିଂ ପାର୍ଟି ଉପରେ ଏହା ତୃତୀୟ ଆକ୍ରମଣ ଘଟଣା। ଏହାପୂର୍ବରୁ ସୋମବାର ପୁଲଓ୍ୱାମାରେ ସିଆରପିଏଫ୍ ପାଟ୍ରୋଲିଂ ପାର୍ଟି ଉପରେ ଗ୍ରେନେଡ୍ ମାଡ଼ ହୋଇଥିବା ବେଳେ ସେହିଦିନ ତ୍ରାଲ୍ ଅଞ୍ଚଳରେ ମଧ୍ୟ ଗ୍ରେନେଡ୍ ମାଡ଼ ଘଟଣା ନଜରକୁ ଆସିଥିଲା