ବେଜିଂ: ଭାରତର ଅରୁଣାଚଳ ପ୍ରଦେଶକୁ ନିଜ ଅଞ୍ଚଳ ବୋଲି ଦାବି କରୁଥିବା ଚାଇନା ଆଜି ନିଜର କ୍ରୋଧ ଜାହିର କରିଛି। ଦେଶର ବିଭିନ୍ନ ସ୍ଥାନରୁ ପ୍ରାୟ ୩୦ ହଜାର ମାନଚିତ୍ର ସଂଗ୍ରହ କରାଯାଇ ସେଗୁଡିକୁ ନଷ୍ଟ କରିଦିଆଯାଇଛି। କାରଣ, ଏଥିରେ ଅରୁଣାଚଳ ପ୍ରଦେଶ ଓ ତାଇୱାନକୁ ଚୀନ୍ର ଅଂଶବିଶେଷ ଭାବେ ଦର୍ଶାଯାଇ ନ ଥିଲା। ତେଣୁ ଏଭଳି 'ଭୁଲ ମ୍ୟାପ୍' ବିରୋଧରେ ସରକାର ତୁରନ୍ତ କାର୍ଯ୍ୟାନୁଷ୍ଠାନ ନେବାକୁ ନିର୍ଦ୍ଦେଶ ଦେଇଥିଲେ।
ଏହାପରେ କଷ୍ଟମ ବିଭାଗ ବିଭିନ୍ନ ସ୍ଥାନ ଓ ସୂତ୍ରରୁ ଏଭଳି ୨୮୯୦୮ଟି 'ଭୁଲ' ମାନଚିତ୍ରକୁ ଜବତ କରିଥିଲା। ଏହାପରେ ସେହି ମ୍ୟାପ୍କୁ ନଷ୍ଟ କରାଯାଇଥିଲା। ଏ ସଂକ୍ରାନ୍ତ ଖବର ଚାଇନା ସରକାରଙ୍କ ମୁଖପାତ୍ର ଗ୍ଲୋବାଲ ଟାଇମ୍ସରେ ପ୍ରକାଶ ପାଇଛି।
ଅରୁଣାଚଳ ପ୍ରଦେଶ ଭାରତର ବୋଲି ସମସ୍ତେ ଜାଣିଛନ୍ତି। ସେହିପରି ତାଇୱାନ୍ ମଧ୍ୟ ଏକ ସ୍ୱତନ୍ତ୍ର ରାଷ୍ଟ୍ର। ଏହା ସତ୍ତ୍ୱେ ଚାଇନା ବଳପୂର୍ବକ ଏହାକୁ ନିଜର ବୋଲି ଦାବି କରିଆସୁଛି।