ନୂଆଦିଲ୍ଲୀ: ଲୋକସଭାରେ ପାରିତ ହୋଇଯାଇଛି ମୁସ୍ଲିମ୍ ମହିଳା (ବିବାହ ଅଧିକାର ସଂରକ୍ଷଣ) ବିଧେୟକ-୨୦୧୭ ସର୍ବସମ୍ମତ ପାରିତ ହୋଇଛି। ବିଲ୍ରେ ସଂଶୋଧନ ନେଇ ଆସିଥିବା ସମସ୍ତ ପ୍ରସ୍ତାବ ନାକଚ ହୋଇଯିବା ପରେ ବାଚସ୍ପତି ସୁମିତ୍ରା ମହାଜନ ବିଲ୍ ପାସ୍ ନେଇ ଘୋଷଣା କରିଥିଲେ। ଏବେ ଏହାକୁ ରାଜ୍ୟସଭାରେ ଉପସ୍ଥାପନ କରାଯିବ।
ମୁସ୍ଲିମ୍ ମହିଳାଙ୍କୁ ନ୍ୟାୟ ଓ ଲିଙ୍ଗଗତ ସମାନତା ଦେବାରେ ଏହା ଏକ ଐତିହାସିକ ପଦକ୍ଷେପ ବୋଲି କେନ୍ଦ୍ର ସରକାର କହିଛନ୍ତି। ଲୋକସଭାରେ ବିଲ୍ ଉପସ୍ଥାପନ କରିବା ପରେ ଆଇନ୍ ମନ୍ତ୍ରୀ ରବିଶଙ୍କର ପ୍ରସାଦ ଏହାକୁ ରାଜନୈତିକ ଦୃଷ୍ଟିକୋଣରେ ନ ଦେଖିବାକୁ ଅନୁରୋଧ କରିଥିଲେ। ଏହାସହ ସେ କହିଥିଲେ- ଏହାକୁ କୌଣସି ଧର୍ମ ସହ ଯୋଡ଼ା ନଯାଉ। ରାଜନୈତିକ ମତଭେଦକୁ ଛାଡି ବିଲ୍ ପାସ୍ରେ ସହଯୋଗ କରିବାକୁ ସେ ସବୁ ସାଂସଦଙ୍କୁ ଅନୁରୋଧ କରିଥିଲେ।
କଂଗ୍ରେସ ବିଲ୍କୁ ସମର୍ଥନ କରିଥିଲେ ବି ଏଥିରେ କିଛି ତ୍ରୁଟି ଥିବା ଅଭିଯୋଗ କରିଥିଲା। ଏହି ତ୍ରୁଟିର ଦୁରୂପଯୋଗ ହେବାର ଆଶଙ୍କା କରିବା ସହ ମହିଳାଙ୍କ ଭରଣପୋଷଣ ଓ ଭତ୍ତା ପାଇଁ କ’ଣ କରାଯାଉଛି ବୋଲି ପ୍ରଶ୍ନ କରିଥିଲା।