ନୂଆଦିଲ୍ଲୀ: ଆଜି ଲୋକସଭାରେ ମୋଦି ସରକାର ଆଗତ କରିବେ ତିନି ତଲାକ୍ ବିଲ୍। ଏହି ବିଧେୟକ ଉପରେ ଆଜି ଗୃହରେ ଆଲୋଚନା ହେବା ପରେ ଏହା ପାରିତ ହେବାର ସମ୍ଭାବନା ରହିଛି। ଏଥିପାଇଁ ବୁଧବାର ବିଜେପି ସମସ୍ତ ସାଂସଦଙ୍କୁ ହ୍ପିପ୍ ଜାରି କରିଛି। ଏହି ବିଧେୟକରେ ତିନି ତଲାକ ଏକ ଅପରାଧ ବୋଲି ବିବେଚିତ କରାଯାଇଛି ଏବଂ ଯିଏ ଦୋଷୀ ତାକୁ ଜେଲରେ ସଜା କାଟିବାକୁ ପଡ଼ିବ ବୋଲି ନିୟମ ରହିଛି।
ନରେନ୍ଦ୍ର ମୋଦି ସରକାର ଦ୍ୱିତୀୟ ଥର ପାଇଁ ସରକାର ଗଢ଼ିବା ପରେ ସଂସଦର ପ୍ରଧାନମନ୍ତ୍ରୀ ଅଭିଭାଷଣ ରଖିଥିଲେ। ଏହି ସମୟରେ ପ୍ରଥମେ ତିନି ତଲାକ ବିଧେୟକର ଉଦ୍ଦେଶ୍ୟ ବାବଦରେ କହିଥିଲେ। ତେବେ ସରକାରଙ୍କ ଏହି ବିଧେୟକକୁ ସେତେବେଳେ ବିରୋଧୀ ବିରୋଧ କରିବା ସହିତ ଅନେକ ସମାଲୋଚନା ମଧ୍ୟ କରିଥିଲେ। ତେବେ ଏହି ବିଧେୟକ ଲୋକଙ୍କୁ ସମାନତା ଏବଂ ନ୍ୟାୟ ଦେବାରେ ସହାୟକ ହେବ ବୋଲି ପ୍ରଧାନମନ୍ତ୍ରୀ ଯୁକ୍ତି ବାଢ଼ିଥିଲେ। କଂଗ୍ରେସ, ତୃଣମୂଳ କଂଗ୍ରେସ ଏବଂ ଡିଏମକେ ଏହି ବିଧେୟକ ବାବଦରେ ଯାଞ୍ଚ କରିବା ପାଇଁ ସଂସଦୀୟ କମିଟି ତିଆରି କରାଯାଉ ବୋଲି ଦାବି କରିଥିଲେ।
ସୂଚନାଯୋଗ୍ୟ, ବିଜେପି ନେତୃତ୍ୱାଧୀନ ଏନଡିଏ ସରକାର ପାଖରେ ଲୋକସଭାରେ ସଂଖ୍ୟା ଗରିଷ୍ଠତା ଥିବାରୁ ଏହି ବିଧେୟକକୁ ପାରିତ କରିବାରେ କୌଣସି ଅସୁବିଧା ହେବ ନାହିଁ। କିନ୍ତୁ ରାଜ୍ୟସଭାରେ ଏହି ବିଲ୍ ପାସ କରିବା ଶାସକ ଦଳ ପାଇଁ ଚ୍ୟାଲେଞ୍ଜ ରହିବ। କାରଣ ଏନଡିଏରେ ଥିବା ଅଂଶୀଦାର ଦଳ ଜେଡିୟୁ ଏହି ବିଧେୟକକୁ ରାଜ୍ୟସଭାରେ ବିରୋଧ କରିବ ବୋଲି ପୂର୍ବରୁ କହି ସାରିଛି। ଏଥିସହ ରାଜ୍ୟସଭାରେ ଶାସକ ଦଳ ତୁଳନାରେ ବିରୋଧୀଙ୍କ ସଂଖ୍ୟା ଅଧିକ ରହିଛି ।
ମୋଦିଙ୍କ ପ୍ରଥମ ସରକାର ବେଳେ ଏହି ବିଧେୟକ ଲୋକସଭାରେ ପାରିତ ହୋଇଯାଇଥିଲା। କିନ୍ତୁ ରାଜ୍ୟସଭାରେ ଶାସକ ଦଳର ସଂଖ୍ୟା ନଥିବାରୁ ବିଧେୟକଟି ପାରିତ ହୋଇ ପାରିନଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
