ହାଇଦ୍ରାବାଦ: ଲକଡାଉନ୍ ପାଇଁ ବିବାହ ବିଳମ୍ୱ ହେବାରୁ ଶେଷରେ ଭାବି ଦମ୍ପତ୍ତି ଆତ୍ମହତ୍ୟା କରିଛନ୍ତି। ତେଲେଙ୍ଗାନାର ଆଦିଲାବାଦ ଜିଲ୍ଲାର ନରନୋର ମଣ୍ଡଳରେ ଏଭଳି ଅଭାବନୀୟ ଘଟଣା ଘଟିଛି ବୋଲି ପୁଲିସ୍ କହିଛି। ମୃତକ ଦ୍ୱୟ ହେଲେ ପେଣ୍ଡୁର ଗଣେଷ (୨୨) ଏବଂ ସୋୟମ ସୀଥାବାଈ (୨୦)। ବିଲରେ କୀଟନାଶକ ପିଇ ଏହି ଦୁଇ ଭାବି ଦମ୍ପତ୍ତି ଆତ୍ମହତ୍ୟା କରିଛନ୍ତି।
ଗଣେଷ ପେଶାରେ ଜଣେ ଚାଷୀ। ନିଜ ଗାଁର ଝିଅ ସୀଥାବାଈକୁ ସେ ଦୀର୍ଘ ବର୍ଷ ହେବ ପ୍ରେମ କରୁଥିଲା। ଗତମାସ ଦୁହିଁଙ୍କର ବିବାହ ହେବ ବୋଲି ତାରିଖ ଧାର୍ଯ୍ୟ ହୋଇଥିଲା। ହେଲେ କରୋନା ସଂକ୍ରମଣକୁ ରୋକିବାକୁ ଯାଇ ଦେଶ ଲକଡାଉନ୍ ରହିବାରୁ ଦୁହିଁଙ୍କ ପରିବାର ଲୋକେ ବିବାହ ତାରିଖ ଘୁଞ୍ଚାଇ ଦେଇଥିଲେ। ହେଲେ ଏହାକୁ ନେଇ ଉଭୟ ପ୍ରେମିକ ପ୍ରେମିକା ଅସନ୍ତୋଷ ପ୍ରକାଶ କରିଥିଲେ। ଏହାପରେ ଦୁହେଁ କୀଟନାଶକ ପିଇ ବିଲରେ ଆତ୍ମହତ୍ୟା କରିଛନ୍ତି ବୋଲି ନରନୋର ଥାନା ସବ୍ ଇନସପେକ୍ଟର ଏମ୍ ବିଜୟ କହିଛନ୍ତି। ପୁଲିସ ଏବେ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଚଳାଇଛି।
ସୂଚନାଯୋଗ୍ୟ, ଲକଡାଉନ୍ ପାଇଁ ଦେଶରେ ଏବେ ଧାର୍ମିକ ସମାରୋହ, ବିବାହ ଆଦି ବାତିଲ୍ କରାଯାଇଛି।