କେନ୍ଦୁଝର (ପ୍ରଣୟ ପାଣି): କେନ୍ଦୁଝର ସଦର ଥାନା ଅନ୍ତର୍ଗତ ଖୁଣ୍ଟକଟା ଗାଁରେ ଜାନୁଆରୀ ୧୩ ତାରିଖରେ ହୋଇଥିବା ଡବଲ ମର୍ଡର ଘଟଣାର ପର୍ଦ୍ଦାଫାଶ ହୋଇଛି। ବସ୍ତାଏ ଚାଉଳ ଓ ମାତ୍ର ୧୨୦୦ ଟଙ୍କା ପାଇଁ ଦମ୍ପତିଙ୍କୁ ହତ୍ୟା କରିଥିବା ଅଭିଯୋଗରେ ପୁଲିସ ତିନି ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ତିନି ଭାଇ ବୋଲି ଜଣାପଡ଼ିଛି।
ଗତ ୧୩ ତାରିଖରେ ଗାଁର ମିଲୁ ନାୟକ ଓ କସ୍ତୁରୀ ପ୍ରଧାନ ନିଖୋଜ ହୋଇଯାଇଥିଲେ। ବହୁ ଖୋଜାଖୋଜି ପରେ ପାଖ ଜଙ୍ଗଲରେ ଥିବା କୂଅରୁ ଉଭୟଙ୍କ ମୃତଦେହ ମିଳିଥିଲା। ପୁଲିସ୍ ତଦନ୍ତ ବେଳେ ସଂପୃକ୍ତ ତିନି ଭାଇ ଫେରାର ଥିବା ଜଣାପଡ଼ିଛି।
ଗାଁ ଲୋକଙ୍କଠାରୁ ସୂଚନା ପାଇ ପୁଲିସ ଆଜି ୩ ଭାଇଙ୍କୁ ଗିରଫ କରିଛି। ଅଭିଯୁକ୍ତମାନେ ଦମ୍ପତିଙ୍କୁ ହତ୍ୟା କରିଥିବା ସ୍ୱୀକାର କରିଛନ୍ତି ବୋଲି ପୁଲିସ୍ କହିଛି।
ମିଲୁ ଓ କସ୍ତୁରୀ ଜଗୁଆଳି ଭାବେ କାମ କରନ୍ତି। ଜାନୁଆରୀ ୧୩ ତାରିଖରେ ଦରମା ପାଇଥିଲେ। ତିନି ଭାଇ ନିଶାଶକ୍ତ ଅବସ୍ଥାରେ ମିଲୁଙ୍କ ଘରେ ପଶିଥିଲେ ଓ ତାଙ୍କୁ ଧମକଚମକ ଦେଇଥିଲେ। ପରେ ତାଙ୍କ ପାଖରୁ ବସ୍ତାଏ ଚାଉଳ ଓ ୧୨ ଶହ ଟଙ୍କା ଛିନତାଇ କରିଥିଲେ। ଏନେଇ କାଳେ ମିଲୁ ଗାଁ ଲୋକଙ୍କୁ କହିବେ, ସେଥିଲାଗି ଉଭୟଙ୍କୁ ହତ୍ୟା କରି କୂଅରେ ପକାଇ ଦେଇଥିଲେ।