ଆସନ୍ତାକାଲି ପହଂଚିବ ଆଉ ୩.୩୪ଲକ୍ଷ ଡୋଜ୍ କୋଭିସିଲଡ୍ ଟିକା

ଭୁବନେଶ୍ୱର(ଓଡ଼ିଶା ରିପୋର୍ଟର): ଗତ ୧୬ତାରିଖରେ ରାଜ୍ୟକୁ ୪.୦୮ଲକ୍ଷ ଡୋଜ୍ କୋଭିସିଲଡ୍ ଟୀକା ଆସିଥିବାବେଳେ ଆସନ୍ତାକାଲି ଆଉ ୩ଲକ୍ଷ ୩୪ହଜାର ୫୦୦ ଡୋଜ୍ କୋଭିସିଲଡ୍ ଟିକା ଆସିବ। ଆଉ ଏହି ସମସ୍ତ ଟିକା ସ୍ୱାସ୍ଥ୍ୟସେବା ହିତାଧିକାରୀମାନଙ୍କ ପାଇଁ ଉଦ୍ଦିଷ୍ଟ। ତେବେ ଯେଉଁ ହିତାଧିକାରୀମାନେ ସ୍ୱେଚ୍ଛାକୃତ ଟୀକାକରଣକୁ ପ୍ରତ୍ୟାଖ୍ୟାନ କରିବେ ସେମାନଙ୍କୁ ପରବର୍ତ୍ତୀ ସମୟରେ ସରକାରଙ୍କ ପକ୍ଷରୁ ମାଗଣା କୋଭିଡ୍ ଟୀକାକରଣର ସୁଯୋଗ ଦିଆଯିବ ନାହିଁ ବୋଲି ସ୍ୱାସ୍ଥ୍ୟ ବିଭାଗ ପକ୍ଷରୁ ସୂଚନା ଦିଆଯାଇଛି।
ସ୍ୱାସ୍ଥ୍ୟ ବିଭାଗର ସୂଚନା ଅନୁସାରେ, ପ୍ରଥମ ଦିନରେ ୧୬୧ଟି ସେସନରେ ମୋଟ ୧୩,୯୮୦ଜଣ ସ୍ୱାସ୍ଥ୍ୟସେବା କର୍ମଚାରୀଙ୍କୁ ଟୀକା ଦିଆଯାଇଥିଲା। ଆଜି ମୋଟ ୩୮୦ଟି ସେସନରେ ସନ୍ଧ୍ୟା ୬ଟା ସୁଦ୍ଧା ୩୦,୧୬୧ଜଣ ସ୍ୱାସ୍ଥ୍ୟ କର୍ମଚାରୀଙ୍କ ଟୀକା ପ୍ରଦାନ କରାଯାଇଛି । ଯାହା ଆଜି ତାଲିକାଭୁକ୍ତ ହୋଇଥିବା ମୋଟ ହିତାଧିକାରୀଙ୍କର ୯୫ ପ୍ରତିଶତ। ଆଜି ଗୋଟିଏ ସାମାନ୍ୟଧରଣର ପାଶ୍ୱର୍ ପ୍ରତିକ୍ରିୟା ମାମଲା ରିପୋର୍ଟ ହୋଇଛି। ସମ୍ପୃକ୍ତ ହିତାଧିକାରୀ ଏବେ ଭଲ ଅଛନ୍ତି।

ଆସନ୍ତାକାଲି ୩ଲକ୍ଷ ୩୪ହଜାର ୫୦୦ ଡୋଜ୍ କୋଭିସିଲଡ୍ ଟିକା ଓଡ଼ିଶାରେ ପହଂଚିବାର ଥିବାରୁ ରାଜ୍ୟର ସମସ୍ତ ସ୍ୱାସ୍ଥ୍ୟସେବା କର୍ମଚାରୀଙ୍କ ପୂର୍ଣ୍ଣ ଟୀକାକରଣ ପାଇଁ ଖୁବଶୀଘ୍ର ପର୍ଯ୍ୟାପ୍ତ ପରିମାଣର ଟିକା ଓଡ଼ିଶାରେ ଉପଲବ୍ଧ ହେବ। ସେଥିପାଇଁ ହିତାଧିକାରୀମାନଙ୍କୁ ଟୀକାକରଣ ପାଇଁ ଆସିବାକୁ ସରକାର ପୁଣିଥରେ ଅନୁରୋଧ କରିଛନ୍ତି। ଆଜି ରାଜସ୍ୱ ବିଭାଗ ଅଧୀନରେ ଥିବା ଆଗଧାଡ଼ିର କର୍ମଚାରୀମାନେ ତାଲିକାଭୁକ୍ତ ହେବା ନେଇ ସମସ୍ତ ଜିଲ୍ଲା ସହିତ ଏକ ଭିଡିଓ କନଫରେନ୍ସ ହୋଇଥିଲା। ଆସନ୍ତା ୨୫ତାରିଖ ସୁଦ୍ଧା ପଞ୍ଜିକରଣ ପ୍ରକ୍ରିୟା ଶେଷ କରିବାକୁ ସମସ୍ତ ଜିଲ୍ଲାକୁ ନିର୍ଦ୍ଦେଶ ଦିଆଯାଇଛି।
ଆଜିଠୁ ଏହି ଟୀକାକରଣ କାର୍ଯ୍ୟକ୍ରମ ଜାରି ରଖିବା ପାଇଁ ସମସ୍ତ ଜିଲ୍ଲାକୁ ସେମାନଙ୍କର ମାଇକ୍ରୋ-ପ୍ଲାନ ଦାଖଲ କରିଛନ୍ତି।