ରାଇରଙ୍ଗପୁର (ରାଜେଶ କୁମାର ଶର୍ମା): ଜୀବନ ଭୟରେ ଘଞ୍ଚ ଜଙ୍ଗଲ ଭିତରେ ପଥର ଗୁମ୍ଫାରେ ରହୁଛନ୍ତି ଏକ ଆଦିବାସୀ ଖଡିଆ ପରିବାର। ଏପରି ଘଟଣା ମୟୂରଭଂଜ ଜିଲ୍ଲା ରାଇରଙ୍ଗପୁର ବ୍ଲକ ଝାଡଖଣ୍ଡ ସୀମାନ୍ତ ମାଙ୍କଡଗୋଡା ଗାଁରେ ଘଟିଛି।
ମାଙ୍କଡଗୋଡା ଗାଁରେ ବାସ କରନ୍ତି ଶନିବାରୀ ଦେହୁରୀ ଓ ତାଙ୍କ ପରିବାର। କିନ୍ତୁ ତାଙ୍କୁ ତାଙ୍କ ପଡୋଶୀମାନେ ଝଗଡା କରିବା ପରେ ମାରିଦେବାକୁ ଧମକ ଦେଇଥିବା ଅଭିଯୋଗ ହୋଇଛି। ଏଥିରେ ଭୟଭୀତ ହୋଇ ଶନିବାରୀ ପରିବାର ସହ ଘର ଛାଡି ଝାଡଖଣ୍ଡ ଅଂଚଳକୁ ପଳାଇ ଯାଇ ସେଠାରେ ଜଙ୍ଗଲରେ ଥିବା ଏକ ପଥର ଗୁମ୍ଫାରେ ରହିଥିଲେ। ଘଟଣା ସଂପର୍କରେ ଜାଣିବା ପରେ ଝାଡଖଣ୍ଡ ପୂର୍ବ ସିଂହଭୂମ ବିଧାୟକ ସଂଜୀବ ସରଦାର ଘଟଣାସ୍ଥଳକୁ ଯାଇ ଶନିବାରୀଙ୍କ ଦୁଃଖ ବୁଝିଥିଲେ। ଏପରିକି ତାଙ୍କୁ ଖାଦ୍ୟ ଯୋଗାଇଦେଇଥିଲେ। ଏହାପରେ ରାଜ୍ୟସଭା ସାଂସଦ ମମତା ମହାନ୍ତ, ବିଜେଡି ନେତା କାଶୀନାଥ ହେମ୍ବ୍ରମ ଘଟଣାସ୍ଥଳକୁ ଯାଇ ଶନିବାରୀଙ୍କୁ ଭେଟି ତାଙ୍କ ପରିବାରକୁ ସୁରକ୍ଷା ଦେବାର ପ୍ରତିଶ୍ରୁତି ଦେଇ ମାଙ୍କଡଗୋଡା ଗାଁକୁ ଫେରାଇ ଆଣିଥିଲେ। ଏନେଇ ଗୋରୁମହିଷାଣୀ ଥାନା ପୁଲିସ ଘଟଣାର ତଦନ୍ତ କରୁଛି।