କଣ୍ଟାବାଞ୍ଜି(ଅନ୍ତିମ ପାଣିଗ୍ରାହୀ): ନାଳ ପାଣିକୁ କେନ୍ଦ୍ର କରି ହୋଇଛି ରକ୍ତାକ୍ତ ସଂଘର୍ଷ। ଏପରିକି ଜଣେ ଯୁବକଙ୍କ କଟୁରୀ ଚୋଟରେ ପଡ଼ୋଶୀ ଘରର ଜଣେ ବ୍ୟକ୍ତି ଗୁରୁତର ହୋଇଥିବା ଜଣାଯାଇଛି। ବଲାଙ୍ଗିର ଜିଲ୍ଲା କଣ୍ଟାବାଞ୍ଜି ସହରର ଦୁଇ ନମ୍ବର ୱାର୍ଡରେ ଘଟିଛି ଏପରି ଅଭାବନୀୟ ଘଟଣା। ଗୁରୁତରଜଣକ ହେଲେ କଣ୍ଟାବାଞ୍ଜି ସହର ଚିଙ୍ଗୁଡ଼ିପଡାର ଦିଲୀପ ରଣା ।
ଦିଲୀପଙ୍କ ପୁତୁରା ଡୋଳାମଣିଙ୍କ କହିବା ଅନୁସାରେ, ଦୁଇ ଦିନ ହେବ କଣ୍ଟାବାଞ୍ଜି ସହରରେ ପ୍ରବଳ ବର୍ଷା ହେଉଥିବାରୁ ନାଳ ପାଣି ପଡୋଶୀ ସୋନୁ ନାଏକଙ୍କ ଘରେ ପଶି ଯାଇଥିଲା । ଏହାକୁ କେନ୍ଦ୍ର କରି ଗତକାଲି ରାତିରେ ଉଭୟ ଦିଲୀପ ଓ ପଡୋଶୀ ସୋନୁ ନାଏକଙ୍କ ମଧ୍ୟରେ ବଚସା ହୋଇଥିଲା । ଏଥିରେ ଉତ୍ତ୍ୟକ୍ତ ସୋନୁ ଏକ କଟୁରୀରେ ଦିଲୀପଙ୍କୁ ଆକ୍ରମଣ କରିଥିଲା। ଗୁରୁତର ଅବସ୍ଥାରେ ତାଙ୍କୁ ପ୍ରଥମେ କଣ୍ଟାବାଞ୍ଜି ଓ ସେଠାରୁ ବଲାଙ୍ଗୀର ହସ୍ପିଟାଲକୁ ସ୍ଥାନାନ୍ତର କରାଯାଇଛି। ପୁଲିସ୍ ସୋନୁଙ୍କୁ ଅଟକ ରଖି ଅଧିକ ତଦନ୍ତ କରୁଛି ।