ଅବହେଳିତ ଅବସ୍ଥାରେ ଏସିଆର ସର୍ବବୃହତ୍ ଏୟାରଷ୍ଟ୍ରିପ୍‌

<p>ବାରିପଦା(ମାଣିକଲାଲ ପାଣି): ୯ ଶହ ଏକର ଅଞ୍ଚଳ। ୧୧ ହଜାର୍ ଫୁଟ୍ ବା ସାଢ଼େ ୩ କିଲୋମିଟରର ରନ୍&zwnj;ୱେରେ ପରିବ୍ୟାପ୍ତ ଅମର୍ଦ୍ଦା ଏୟାଷ୍ଟ୍ରିପ୍। ହେଲେ ଏବେ ଦିଶୁଛି ଖାଲି ବଣବୁଦା ଆଉ ଉଇହୁଙ୍କା। ଦିଶୁଛି ତ କେବଳ ରନ୍&zwnj;ୱେର ୧ ନମ୍ବର ଲ୍ୟାଣ୍ଡିଂ ଜୋନ୍ ଓ ଗୋଟିଏ ବଙ୍କର୍। ଯାହାକୁ ସ୍ଥାନୀୟ ଲୋକେ କୁହନ୍ତି ୩ କୋଟିର ସୁଡଙ୍ଗ। କଥାଟି କ&rsquo;ଣ ଜାଣିଛନ୍ତି? ବାସ୍ତବରେ ଏହାକୁ ଏସିଆର ସର୍ବବୃହତ୍ ଏୟାରଷ୍ଟ୍ରିପ୍&zwnj; କୁହାଯାଉଛି। ୧୯୪୦ ମସିହାରେ ଦ୍ୱିତୀୟ ବିଶ୍ୱଯୁଦ୍ଧ ବେଳେ ଏହାକୁ ଜାପାନ ବିରୋଧରେ ବ୍ରିଟିଶ୍ ସରକାର ବ୍ୟବହାର କରିଥିବା କୁହାଯାଏ। ସେତେବେଳେ ଏହାକୁ ତିଆରି କରିବାକୁ ଖର୍ଚ୍ଚ ହୋଇଥିଲା ୩ କୋଟି ଟଙ୍କା।</p> <p>ଦ୍ୱିତୀୟ ବିଶ୍ୱଯୁଦ୍ଧର ମୁକସାକ୍ଷୀ ମୟୂରଭଞ୍ଜର ଅମର୍ଦ୍ଦା ଏୟାରଷ୍ଟ୍ରିପ କିନ୍ତୁ ଏବେ ଅବହେଳିତ। ଗବେଷକ, ଐତିହାସିକ ଓ ସରକାରଙ୍କ ନଜର ଆଢୁଆଳରେ। ଏହାର ପୁନଃଉଦ୍ଧାର କରାଗଲେ ଏହା ପଛରେ ଥିବା ଇତିହାସକୁ ଯୁବପିଢ଼ି ଜାଣିପାରିବେ ବୋଲି ସ୍ଥାନୀୟ ଲୋକେ ଆଶା ରଖିଛନ୍ତି।</p> <p>ଲୋକଲୋଚନଠୁ ବହୁ ଦୂରରେ ଥିବା ଏହି ଇଂରେଜ ଅମଳର ଏୟାରଷ୍ଟ୍ରିପ୍&zwnj; ହୁଏତ ଆଜି ବି ବହନ କରୁଥାଇପାରେ ଅନେକ ଇତିହାସର ଗାଥା। ହେଲେ ଏବେ ଏହି ବଙ୍କର୍ ହିଁ ତାହାର ମୁକସାକ୍ଷୀ। ଏହା ଭିତରକୁ ୧୫-୨୦ ଫୁଟ୍ ଯିବା ପରେ ଏକ ସିମେଣ୍ଟ୍ କଂକ୍ରିଟ କାନ୍ଥରେ ବଙ୍କରକୁ ସିଲ୍ କରାଯାଇଥିବା ଦେଖିବାକୁ ମିଳେ।&nbsp; କୁହାଯାଏ&nbsp; ବ୍ରିଟିଶ୍ ସେନା ଏହି ସ୍ଥାନକୁ ଛାଡ଼ିବା ପୂର୍ବରୁ ଏଠାରେ ଗୋଳାବାରୁଦ, ଗାଡ଼ି ଓ ଅନ୍ୟ ସରଞ୍ଜାମ ଛାଡ଼ିଯାଇଥିଲେ ଏବଂ ତାହାକୁ ବଙ୍କର୍ ଭିତରେ ସିଲ୍ କରିଦେଇଥିଲେ। ହୁଏତ ଏହାକୁ ଖୋଳାଗଲେ ସଠିକ୍ ତଥ୍ୟ ସାମ୍ନାକୁ ଆସିପାରିବ। ତେଣୁ ଏହି ସ୍ଥାନ ବିଷୟରେ ଅଧିକ ଗବେଷଣାର ଆବଶ୍ୟକତା ଥିବା ସ୍ଥାନୀୟ ଯୁବପିଢ଼ି ମତ ରଖିଛନ୍ତି।</p>