ସମ୍ବଲପୁର (ଓଡ଼ିଶା ରିପୋର୍ଟର): କିଛି ଦିନ ତଳେ ବଲାଙ୍ଗିର ଜିଲ୍ଲାରେ ଜଣେ ପୁଲିସ୍ ଏଏସ୍ଆଇ ଛେଳି ଚୋରି କରି ଚର୍ଚ୍ଚାକୁ ଆସିଥିବା ବେଳେ ଆଜି ଶାଢ଼ି ଚୋରି କରି ଫସିଛନ୍ତି ଆଉ ଜଣେ ସରକାରୀ ଚାକିରିଆ। ଘଟଣାଟି ଘଟିଛି ସମ୍ବଲପୁରରେ।
ଶାଢ଼ି ଚୋରି କରି ଗିରଫ ହୋଇଥିବା ଏହି ସରକାରୀ ଚାକିରିଆ ଜଣେ ମହିଳା। ତାଙ୍କ ନାଁ ସନ୍ଧ୍ୟା ଆନନ୍ଦ ଦୋରା। ସେ ସହକାରୀ ରାଜସ୍ୱ ନିରୀକ୍ଷକ (ଏଆର୍ଆଇ) ଅଛନ୍ତି। ଏବେ ସେ ସମ୍ବଲପୁର ଜିଲ୍ଲା ଯୁଯୁମରା ତହସିଲ୍ କାର୍ଯ୍ୟାଳୟରେ ଅଛନ୍ତି।
ସନ୍ଧ୍ୟା ଆନନ୍ଦ ସମ୍ବଲପୁର ସହରର ଭିଏସ୍ଏସ୍ ମାର୍ଗ ସ୍ଥିତ ଏକ ଶୋ’ରୁମ୍ରୁ ଶାଢ଼ି ଚୋରି କରିଥିଲେ। ଏହି ଶାଢ଼ିର ଦାମ ୩୫ ହଜାର ଟଙ୍କା। ଶାଢ଼ିଟିକୁ ସେ ଲୁଚାଇ ନେଉଥିବାର ଦୃଶ୍ୟ ସିସିଟିଭିରେ କଏଦ ହୋଇଯାଇଥିଲା।
ଅଭିଯୋଗ ପରେ ସିସିଟିଭି ଫୁଟେଜ ଆଧାରରେ ସହକାରୀ ରାଜସ୍ୱ ନିରୀକ୍ଷକ ସନ୍ଧ୍ୟା ଆନନ୍ଦ ଦୋରାଙ୍କୁ ଗିରଫ କରାଯାଇଛି। ତାଙ୍କ ଠାରୁ ଚୋରି ଶାଢ଼ିଟିକୁ ମଧ୍ୟ ଜବତ କରାଯାଇଛି।