ଅରୁଣଙ୍କ ପାଖରେ ଆପତ୍ତି ଜଣାଇବାକୁ ଯାଇଥିଲେ, ଉଠ୍‌ବସ୍‌ ହୋଇ ଫେରିଲେ

ବାରିପଦା (ମାଣିକ ଲାଲ୍‌ ପାଣି): ବିଜେଡି ବିଧାୟକ ଅରୁଣ ସାହୁଙ୍କ ଦାଦାଗିରି। ଆପତ୍ତି କରିବାକୁ ଯାଇଥିବା ଛାତ୍ର ନେତାଙ୍କୁ ଉଠ୍‌ବସ୍‌ କରାଇଲେ। ଥରେ କି ଦୁଇ ଥର ନୁହେଁ। ୭୦ରୁ ଅଧିକ ଥର ଉଠ୍‌ବସ୍‌ କରାଇବା ସହିତ ଅଶ୍ଲୀଳ ଭାଷାରେ ଅରୁଣ ଗାଳି ଦେଇଥିବା ଅଭିଯୋଗ ହୋଇଛି। ଛାତ୍ର ନେତା ଜଣକ ଏନେଇ ଆଜି ସୋସିଆଲ୍‌ ମିଡ଼ିଆ ଫେସ୍‌ବୁକ୍‌ରେ ଅଭିଯୋଗ କରିଛନ୍ତି। ଏହାକୁ ନେଇ ବାରିପଦାସ୍ଥିତ ଉତ୍ତର ଓଡ଼ିଶା ବିଶ୍ୱବିଦ୍ୟାଳୟର ଛାତ୍ରଛାତ୍ରୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।

ଅଭିଯୋଗରୁ ପ୍ରକାଶ, ଉତ୍ତର ଓଡ଼ିଶା ବିଶ୍ୱବିଦ୍ୟାଳୟର ସମସ୍ତ ସ୍ୱୟଂ ବିତ୍ତୀୟ ବିଭାଗ ଗୁଡ଼ିକ ନିୟମିତ କରିବା ସମ୍ପର୍କରେ ଆଲୋଚନା ପାଇଁ ଛାତ୍ର ସଂସଦ ସଭାପତି ତୁଷାର ନାୟକ ଗତକାଲି ବାରିପଦା ନଗରପାଳ ଜିତେନ୍ଦ୍ର ମହାନ୍ତିଙ୍କୁ ଫୋନ୍‌ କରିଥିଲେ। ତାଙ୍କଠାରୁ ଡାକରା ପାଇ ଆଜି ତୁଷାର ସର୍କିଟ୍‌ ହାଉସ୍‌କୁ ଯାଇଥିଲେ। ମାତ୍ର ଜାଣିନଥିଲେ ସେଠାକୁ ମୟୂରଭଞ୍ଜ ଜିଲ୍ଲା ବିଜେଡି ପର୍ଯ୍ୟବେକ୍ଷକ ଅରୁଣ ସାହୁ ଆସିଛନ୍ତି ବୋଲି। ତୁଷାର ନିଜର ଆପତ୍ତି କହିବା ବେଳେ ସେଠାରେ ଉପସ୍ଥିତ ଥିବା ଅରୁଣ ତାଙ୍କୁ ଅଶ୍ଲୀଳ ଭାଷାରେ ଗାଳି ଦେଇଥିଲେ। ଏପରିକି ରୁମ୍‌ରୁ ବାହାରିଯିବାକୁ ଅରୁଣ କହିଥିଲେ। ଏଥିରେ ବ୍ୟଥିତ ହୋଇ ତୁଷାର ସେଠାରୁ ପଳାଇ ଆସିଥିଲେ। କିଛି ସମୟ ପରେ ଅରୁଣ ପୁନର୍ବାର ତୁଷାରଙ୍କୁ ଡାକି ଉଠ୍‌ବସ୍‌ ହେବାକୁ କହିଥିଲେ। ପରେ ସେ ବାଧ୍ୟ ହୋଇ ସମସ୍ତଙ୍କ ସମ୍ମୁଖରେ ୭୦ରୁ ଅଧିକ ଥର ଉଠ୍‌ବସ ହୋଇଥିଲେ। ସବୁ ଗୁରୁତ୍ୱପୂର୍ଣ୍ଣ କଥା ହେଉଛି ଏହି ସମୟରେ ସେଠାରେ ଅନେକ ନେତା ଓ କର୍ମୀ ଉପସ୍ଥିତ ଥିଲେ। ହେଲେ କେହି ପ୍ରତିବାଦ କରିନଥିଲେ। ବରଂ ସମସ୍ତେ ନୀରବଦ୍ରଷ୍ଟା ସାଜିଥିବା ଅଭିଯୋଗ ହୋଇଛି।

ତୁଷାରଙ୍କ ଅଭିଯୋଗ ନେଇ ଅରୁଣଙ୍କ ସହ ଯୋଗାଯୋଗ କରାଯାଇଥିଲା। କିନ୍ତୁ ସେ ଏକ ବୈଠକରେ ବ୍ୟସ୍ତ ଥିବା କହି ପ୍ରତିକ୍ରିୟା ଦେଇନଥିଲେ।