ଫୋନ୍‌ରେ କଥା ହେଉଥିବା ବେଳେ ଭାଙ୍ଗିଲା ଗଛ ଡାଳ, ଚାଲିଗଲା ଅଟୋ ଚାଳକଙ୍କ ଜୀବନ

ଭଞ୍ଜନଗର (ରାଜେଶ କୁମାର ପଣ୍ଡା): ଗଞ୍ଜାମ ଜିଲ୍ଲା ଭଞ୍ଜନଗର ଥାନା ଅନ୍ତର୍ଗତ ଗୁଜୁରାଳି ଗ୍ରାମ ପାଟଖଣ୍ଡା ମନ୍ଦିର ନିକଟରେ ଜଣେ ଅଟୋ ଚାଳକଙ୍କ ଉପରେ ଗଛ ଡାଳ ଭାଙ୍ଗି ପଡ଼ି ଯିବାରୁ ତାଙ୍କର ମୃତ୍ୟୁ ଘଟିଛି। ମୃତକ ଜଣଙ୍କ ହେଲେ ନିରମଣି ସାହୁ।

ନିରମଣି ନିଜ ଗାଁ ହାରିଗଡ଼ରୁ ଭଡ଼ାରେ ଗୁଜୁରାଳି ଗ୍ରାମ ସ୍ଥିତ ପାଟଖଣ୍ଡା ମନ୍ଦିରକୁ ଆସିଥିଲେ। ପାଟଖଣ୍ଡା ମନ୍ଦିରରେ ପହଞ୍ଚିବା ପରେ ଅଟୋ ରଖି ପାଖରେ ଥିବା ଏକ ଗଛମୂଳେ ଛିଡ଼ା ହୋଇ ଫୋନ୍‌ରେ କଥା ହେଉଥିଲେ। ଏହି ସମୟରେ ଗଛରୁ ଏକ ବିରାଟ ଡାଳ ଭାଙ୍ଗି ତାଙ୍କ ଉପରେ ପଡ଼ିଥିଲା। ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ଘଟିଥିଲା।

ସ୍ଥାନୀୟ ଲୋକଙ୍କ ଠାରୁ ଖବର ପାଇ ପୁଲିସ୍ ସେଠାରେ ପହଞ୍ଚିଥିଲା। ପୁଲିସ୍ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ଭଞ୍ଜନଗର ଡାକ୍ତରଖାନାକୁ ପଠାଇଛି। ଏହା ସହିତ ଘଟଣାର ତଦନ୍ତ କରୁଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।