ବଡ଼ଦିନକୁ ନେଇ ଭାଇଚାରର ସହର କଟକରେ ବେଶ ଉତ୍ସାହ ଦେଖିବାକୁ ମିଳୁଛି। ଭାଇଚାରା, ଶାନ୍ତି, ପ୍ରେମର ଏହି ପର୍ବକୁ ପାଳନ ପାଇଁ ସମସ୍ତେ ପ୍ରସ୍ତୁତିରେ ବ୍ୟସ୍ତ। ରଙ୍ଗବେରଙ୍ଗର ଆଲୋକ ସହ ଖ୍ରୀଷ୍ଟମାସ ଟ୍ରି ଓ ସାଣ୍ଟାକ୍ଲଜରେ ବିଭିନ୍ନ ଚର୍ଚ୍ଚ ଓ ଘର ସଜା ଯାଇଛି। ଏହାସହ ଖ୍ରୀଷ୍ଟମାସ ପାଇଁ ଘରେ ଘରେ ବିଭିନ୍ନ ପ୍ରକାରର କେକ୍ ମଧ୍ୟ ପ୍ରସ୍ତୁତ କରାଯାଉଛି। ଆଜି ବିଳମ୍ୱିତ ରାତିରେ ଚର୍ଚ୍ଚରେ ବିଭିନ୍ନ ଭାଷାରେ ସମୂହ କ୍ୟାରୋଲ ପରେ ମହାଦିବ୍ୟ ଯଜ୍ଞ କରାଯିବ।
ଫୁଲବାଣୀ ସ୍ଥିତ ବାପିଟଷ୍ଟ ଚର୍ଚ୍ଚରେ ପ୍ରଭୁ ଯୀଶୁଙ୍କ ଜନ୍ମୋତ୍ସବ ପୂର୍ବରୁ ଖ୍ରୀଷ୍ଟ ଧର୍ମାବଲମ୍ବୀମାନେ ମଣ୍ଡଳ ସ୍ତରୀୟ କ୍ୟାରୋଲ ସହ କ୍ୟାଣ୍ଡେଲ ଜାଳିଥିଲେ। ଚର୍ଚ୍ଚର ଫାଦର ଓ ଖ୍ରୀଷ୍ଟିୟ ଉଦଯୋଗୀ ସମିତିର ସଦସ୍ୟମାନେ ପ୍ରଭୁ ଯୀଶୁଙ୍କ ନୀତିବାଣୀ ପରିବେଷଣ କରିଥିଲେ। ପରେ ଛାତ୍ରଛାତ୍ରୀଙ୍କ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା।
ସେହିପରି ଜି. ଉଦୟଗିରିରେ ମଧ୍ୟ ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି। ସହରରେ ଥିବା ବିଭିନ୍ନ ଚର୍ଚ୍ଚକୁ ରଙ୍ଗବେରଙ୍ଗର ଆଲୋକରେ ସଜା ଯାଇଛି। ମଧ୍ୟରାତ୍ରରେ ଖ୍ରୀଷ୍ଟ ଧର୍ମାବଲମ୍ୱୀମାନେ ସମୂହ ପ୍ରାର୍ଥନ କରିବା ପରେ ଯଜ୍ଞ କରାଯିବ। ସୁରକ୍ଷା ଦୃଷ୍ଟିରୁ ସହରରେ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି।