ମୁଁ ଶବ କହୁଛି…

<p>ବଲାଙ୍ଗିର,(ସସ୍ମିତା ସାହୁ): ମୁଁ ଶବ କହୁଛି । ଦୟାକରି ମତେ ଏଣେ ତେଣେ ଫିଙ୍ଗ ନାହିଁ । ସମ୍ମାନ ନ ଦେଲ ନାହିଁ ଏମିତି ଅସମ୍ମାନ କରନି । ନିଆଁ ଟିକିଏ ନଦେଲେ ନାଇଁ ମାଟି ମୁଠାଏରୁ ବଞ୍ଚିତ କରନି। ଏଠି ସେଠି ଫିଙ୍ଗା ପଡ଼ିଥିବା ମଲା ମଣିଷଙ୍କ ଦେହ, ପଚାଶଢ଼ା ଦେହାବଶେଷରୁ ସତେ ଯେମିତି ଭାସି ଆସୁଛି ଏମିତି ସବୁ ଆର୍ତ୍ତ ଚିତ୍କାର। ବଲାଙ୍ଗିରରୁ ଖୁଜେନ୍&zwnj;ପାଲିକୁ ଯାଇଥିବା କଳା ମଚ୍ ମଚ୍ ରାସ୍ତା କଡ଼ରେ ଏମିତି ଶବ ପଡ଼ିଥିବା ଦେଖିବାବୁ ମିଳିଛି। ସତେଯେମିତି ରାସ୍ତାକଡ଼ ହିଁ &nbsp;ସ୍ୱର୍ଗଦ୍ୱାର ପାଲଟିଛି। ପ୍ରଶ୍ନ ଉଠୁଛି ଏତେ ମଣିଷଙ୍କ ଶବ ଏଠିକୁ କେଉଁଠୁ ଆସିଲା? କିଏ ଏମିତି ଫିଙ୍ଗିଛି ଏମାନଙ୍କୁ?</p> <p>ଅନୁସନ୍ଧାନରୁ ଅବାକ୍ ହେଲା ଭଳି ସତ ଜଣାପଡ଼ିଲା।&nbsp; ଏ କାମ କୁଆଡ଼େ ଖୋଦ୍ ରେଲେଓ୍ୱ ପୋଲିସ ହିଁ&nbsp; ହେଉଛି। କାହିଁ କେତେଦିନୁ ରେଲେଓ୍ୱ ପୋଲିସ୍ ଏଇ ଶ୍ମସାନ ଯାଗାକୁ କରି ଦେଇଛି ମଲା ମଣିଷଙ୍କ ଡମ୍ପିଂ ୟାର୍ଡ। &nbsp;ଦୁର୍ଘଟଣାରେ ମୃତ ଶରୀର ଚିହ୍ନଟ ହୋଇ ନପାରିଲେ ରେଳବାଇ ପୋଲିସ୍ ଏଇଠି ଏମିତି ଭାବେ ଫିଙ୍ଗି ଦେଉଥିବା ଅଭିଯୋଗ ହେଉଛି । କହୁ କହୁ ବଲାଙ୍ଗିର ଜିଆରପିର ଜଣେ କର୍ମଚାରୀ&nbsp; ବି କହିଛନ୍ତି, ମୃତଦେହ ସବୁ ଏଇଠିକୁ ଆସେ।</p> <p>ସୂଚନା ଅନୁଯାୟୀ, ବିଭିନ୍ନ ଘଟଣା, ଦୁର୍ଘଟଣାରୁ ଅନେକ ସମୟରେ ଅଚିହ୍ନା ମୃତଦେହକୁ ଜବତ କରେ ରେଲେଓ୍ୱ ପୋଲିସ୍ । ନିୟମ ମୁତାବକ ବ୍ୟବଚ୍ଛେଦ ପରେ ଚିହ୍ନଟ ପାଇଁ ଶବକୁ ୯୬ ଘଣ୍ଟା ପର୍ଯ୍ୟନ୍ତ ସଂରକ୍ଷଣ କରି ରଖାଯାଏ । କେହି ଦାବିଦାର ନ ଆସିଲେ, ଶବକୁ ସମ୍ମାନର ସହ ସତ୍କାର କରିବା ରେଲେଓ୍ୱ ପୋଲିସର ଦାୟିତ୍ୱ। ଏଥିପାଇଁ ଅର୍ଥର ମଧ୍ୟ ବ୍ୟବସ୍ଥା ଅଛି । ହେଲେ ଦାହ ସଂସ୍କାର ନହେଲେ ନାଇଁ ଅତି କମ୍&zwnj;ରେ ଶବକୁ &nbsp;ଗାତ ଖୋଳି ଭଲଭାବେ ପୋତିବା ପରିରର୍ତ୍ତେ ଅମାନବିକ ଭାବେ ଏଠି ଫିଙ୍ଗାଚାଲିଛି। ଏଭଳି ଆଚରଣକୁ ମାନବାଧିକାର ଉଲ୍ଲଂଘନ କହି ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି ମାନବାଧିକାର କର୍ମୀ। ହେଲେ ଏନେଇ ପ୍ରତିକ୍ରିୟା ଦେବାକୁ ମନା କରିଦେଇଛି ବଲାଙ୍ଗିର ଜିଆରପି।</p>