ମୋହନା (ମିହିର ଜତି): କାର ଓ ବାଇକ ମୁହାଁମୁହିଁ ଧକ୍କାରେ ଚାଲିଗଲା ଦୁଇ ଭାଇଙ୍କ ଜୀବନ। ଦୁର୍ଘଟଣାରେ କାର୍ ଚାଳକ ଗୁରୁତର ଆହତ ହୋଇ ମେଡିକାଲ୍ରେ ଭର୍ତ୍ତି ହୋଇଛନ୍ତି। ଆଜି ଏପରି ମର୍ମନ୍ତୁଦ ସଡ଼କ ଦୁର୍ଘଟଣା ଗଜପତି ଜିଲ୍ଲା ମୋହନା ଥାନା ଅଞ୍ଚଳରେ ଘଟିଛି।
ଅଡ଼ବା ଥାନା ବିକ୍ରମପୁର ଗାଁର ସୁଜିତ ବର୍ଦ୍ଧନ ଓ ତାଙ୍କ ସମ୍ପର୍କୀୟ ଭାଇ ଯାକୁବ ବର୍ଦ୍ଧନ ବାଇକରେ ମୋହନା ଅଭିମୁଖେ ଯାଉଥିଲେ। ପଲ୍ଲୀଗଜପତି ଛକ ନିକଟରେ ସମ୍ମୁଖରୁ ଆସୁଥିବା କାର ସହ ମୁହାଁମୁହିଁ ଧକ୍କା ହୋଇଥିଲା। ଖବର ପାଇ ମୋହନା ଥାନା ପୁଲିସ ଦୁଇ ଭାଇ ଓ କାର ଚାଳକଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ମୋହନା ମେଡ଼ିକାଲରେ ଭର୍ତ୍ତି କରିଥିଲେ। ସେଠାରେ ଦୁଇ ଭାଇଙ୍କୁ ମୃତ ଘୋଷଣା କରିଥିଲେ ଡାକ୍ତର।