ଭୁବନେଶ୍ୱର (ଓଡ଼ିଶା ରିପୋର୍ଟର): ତୃତୀୟ ପର୍ଯ୍ୟାୟ ନିର୍ବାଚନ ୨୩ ତାରିଖରେ ହେବ। ଏଥିରେ ପ୍ରତିଦ୍ୱନ୍ଦିତା କରୁଥିବା ପ୍ରାର୍ଥୀଙ୍କ ମଧ୍ୟରୁ ସବୁଠାରୁ ଧନୀ ହେଉଛନ୍ତି ପୁରୀ ଲୋକସଭା ପ୍ରାର୍ଥୀ ପିନାକୀ ମିଶ୍ର। ସେହିପରି ବିଧାୟକ ପ୍ରାର୍ଥୀଙ୍କ ମଧ୍ୟରେ ବବି ମହାନ୍ତି ହେଉଛନ୍ତି ସବୁଠାରୁ ଧନୀ ପ୍ରାର୍ଥୀ।
ଏଡିଆର୍ ପକ୍ଷରୁ ପ୍ରକାଶ ପାଇଥିବା ରିପୋର୍ଟ ଅନୁସାରେ, ପୁରୀ ଲୋକସଭା ପ୍ରାର୍ଥୀ ପିନାକୀ ମିଶ୍ର ସବୁଠାରୁ ଧନୀ। ତାଙ୍କର ମୋଟ ସଂପତ୍ତି ପରିମାଣ ୧୧୭ କୋଟି ଟଙ୍କା। ଦ୍ୱିତୀୟ ସ୍ଥାନରେ ରହିଛନ୍ତି ସମ୍ୱଲପୁର ଲୋକସଭା ପ୍ରାର୍ଥୀ ନୀତେଶ ଗଙ୍ଗଦେବ। ତାଙ୍କର ମୋଟ୍ ସମ୍ପତ୍ତି ପରିମାଣ ୨୬ କୋଟି ଟଙ୍କା। ତୃତୀୟ ସ୍ଥାନରେ ରହିଛନ୍ତି ଢେଙ୍କାନାଳ ଲୋକସଭା ପ୍ରାର୍ଥୀ କେପି ସିଂହଦେଓ। ତାଙ୍କର ମୋଟ୍ ସମ୍ପତ୍ତି ପରିମାଣ ୧୫ କୋଟି ଟଙ୍କା ରହିଛି।
ସେହିପରି ବିଧାୟକ ପ୍ରାର୍ଥୀଙ୍କ ମଧ୍ୟରେ ବଡ଼ମ୍ବାର ବବି ମହାନ୍ତି ସବୁଠାରୁ ଧନୀ। ତାଙ୍କର ମୋଟ୍ ସମ୍ପତ୍ତି ପରିମାଣ ୧୦୬ କୋଟି ୩୨ ଲକ୍ଷ ଟଙ୍କା ରହିଥିବା ବେଳେ ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ମୋଟ୍ ସମ୍ପତ୍ତି ପରିମାଣ ୬୦ କୋଟି ରହିଛି। ତୃତୀୟ ବଡ଼ ଧନୀ ପ୍ରାର୍ଥୀ ହେଉଛନ୍ତି ଚମ୍ପୁଆ ସ୍ୱାଧୀନ ପ୍ରାର୍ଥୀ ଶ୍ରୀମନ୍ତ ତ୍ରିପାଠୀ। ତାଙ୍କର ମୋଟ୍ ସମ୍ପତ୍ତି ପରିମାଣ ୪୬ କୋଟି ରହିଥିବା ଏଡିଆର୍ ରିପୋର୍ଟରୁ ଜଣାପଡ଼ିଛି।
ତୃତୀୟ ପର୍ଯ୍ୟାୟରେ ପ୍ରତିଦ୍ୱନ୍ଦିତା କରୁଥିବା ୪୨ ବିଧାନସଭାର ୩୫୬ ପ୍ରାର୍ଥୀଙ୍କ ମଧ୍ୟରୁ ୧୦୩ କୋଟିପତି ଥିବା ରିପୋର୍ଟରେ କୁହାଯାଇଛି। ଏହି ପର୍ଯ୍ୟାୟରେ ମୋଟ ୩୮ ଜଣ ମହିଳା ଅର୍ଥାତ ୧୧ ପ୍ରତିଶତ ପ୍ରତିଦ୍ୱନ୍ଦ୍ୱିତା କରୁଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
