ଜଗତସିଂହପୁର(ଶଶାଙ୍କ ଶେଖର ପଣ୍ଡା): ଜଗତସିଂହପୁର ବିଜେଡି ସାଂସଦ ଡାକ୍ତର ରାଜଶ୍ରୀ ମଲ୍ଲିକଙ୍କୁ ଆଜି ବିରୋଧର ସାମ୍ନା କରିବାକୁ ପଡ଼ିଛି। ଏକ ଚାରା ରୋପଣ କାର୍ଯ୍ୟକ୍ରମରେ ଯୋଗଦେବା ପାଇଁ ଯାଉଥିବା ବେଳେ ତିର୍ତ୍ତୋଲ ବିଧାୟକଙ୍କ ସମର୍ଥକମାନେ ରାସ୍ତାରେ ଶୋଇ ତାଙ୍କୁ ବିରୋଧ କରିଥିଲେ। ଫଳରେ ସାଂସଦ ହଟହଟା ହୋଇଥିଲେ।
ତିର୍ତ୍ତୋଲ ନିର୍ବାଚନମଣ୍ଡଳୀର କନକପୁର ପଞ୍ଚାୟତରେ ଆଜି ଏକ ଚାରା ରୋପଣ କାର୍ଯ୍ୟକ୍ରମ ଥିଲା। ଏଥିରେ ଯୋଗଦେବା ପାଇଁ ସାଂସଦ ଡାକ୍ତର ରାଜଶ୍ରୀ ମଲ୍ଲିକ କେତେକ କର୍ମୀଙ୍କ ସହ ଯାଉଥିଲେ। ତେବେ ସାରଳା ରୋଡ୍ରେ ତିର୍ତ୍ତୋଲ ବିଧାୟକଙ୍କ ସମର୍ଥକମାନେ ତାଙ୍କୁ ବିରୋଧ କରିଥିଲେ। ଏପରିକି ବିଧାୟକଙ୍କୁ ନଜଣାଇ କାହିଁକି ଆସିଛ ବୋଲି କହିବା ସହିତ ସାଂସଦଙ୍କ ଗାଡ଼ି ଆଗରେ ଶୋଇ ଯାଇଥିଲେ। ଏହାକୁ ନେଇ ଘଟଣା ସ୍ଥଳରେ କିଛି ସମୟ ପାଇଁ ଉତ୍ତେଜନା ପ୍ରକାଶ ପାଇଥିଲା। ପୁଲିସର ହସ୍ତକ୍ଷେପ ପରେ ପରିସ୍ଥିତିରେ ସୁଧାର ଆସିଥିଲା ଏବଂ ରାଜଶ୍ରୀ କନକପୁର ପଞ୍ଚାୟତରେ ପହଞ୍ଚି ପୂର୍ବ ନିର୍ଦ୍ଧାରିତ କାର୍ଯ୍ୟକ୍ରମରେ ଯୋଗଦେଇଥିଲେ।
ସାଂସଦ ମଲ୍ଲିକ କହିଛନ୍ତି,“କେତେକ ମଦ୍ୟପ ମୋତେ ଅଟକାଇବାକୁ ଚେଷ୍ଟା କରିଥିଲେ। ତଥାପି ମୁଁ ନିର୍ଦ୍ଧାରିତ କାର୍ଯ୍ୟକ୍ରମରେ ଯୋଗଦେଇ ଫେରି ଆସିଛି। ତେବେ କିଏ କାହିଁକି ଏଭଳି ବିରୋଧ କରିଛନ୍ତି ତାହା ମୁଁ ଜାଣିନି।”