ଦୋଷ କଲେ ମା’-ବାପା, ଜେଲରେ ବନ୍ଧା ପଡ଼ିଛି ଶୈଶବ

ଭୁବନେଶ୍ୱର,(ଓଡ଼ିଶା ରିପୋର୍ଟର): କେଉଁଠି ନିଷ୍ପାପ ଶିଶୁଟିର କଅଁଳ ବୟସ କଟୁଛି ଜେଲର ଚାରିକାନ୍ଥ ଭିତରେ ତ’ ଆଉ କେଉଁଠି ଜେଲରେ ଥିବା ମା’ଠୁ ଦୂରେଇ ରହି କୁନି ଝିଅଟିର ଜୀବନ କଟୁଛି ଦୁର୍ଦ୍ଦଶାରେ। ରାଜ୍ୟର ବିଭିନ୍ନ ସ୍ଥାନରେ ଦୋଷ କରି ବିଚରାଧୀନ ବନ୍ଦୀ ଭାବେ ସଜା କାଟୁଥିବା ବାପା, ମା’ଙ୍କ ସହ ଜେଲ୍ ଜୀବନ କାଟୁଛନ୍ତି ୨ ମାସରୁ ୬ ବର୍ଷ ବୟସର ୪୬ ଶିଶୁ । ଅଭିଯୋଗ ହେଉଛି, ନା ଉପଯୁକ୍ତ ଭାବେ ସେମାନଙ୍କ ଦେଖାଶୁଣା ହେଉଛି ନା ତାଙ୍କୁ ଦିଆଯାଇପାରୁଛି ସେମାନଙ୍କ ଅଧିକାର।  ଏହାକୁ ନେଇ ଏବେ ବିଭିନ୍ନ ମହଲରେ ଉଦ୍‌ବେଗ ପ୍ରକାଶ ପାଇଛି ।

ଦୋଷ କଲା ମା’, ଦଣ୍ଡ ଭୋଗୁଛି ଛୁଆ

ଦୋଷ କଲା ମା, ଦଣ୍ଡ ଭୋଗୁଛି ଛୁଆ। ଆଇନର ଅଡୁଆ  ଜାଲରେ ଛନ୍ଦି ହୋଇପଡ଼ିଛି ଶୈଶବ। ମୟୁରଭଞ୍ଜ ଜିଲ୍ଲା ବିଶୋଇ ଥାନା ଅଞ୍ଚଳର ଜଣେ ବିଚାରାଧିନ ବନ୍ଦୀଙ୍କ କୁନି ଝିଅର ଘଟଣା।  ବାପାକୁ ହତ୍ୟା ଅଭିଯୋଗରେ ୨୦୧୬ରୁ ବିଚରାଧିନ ବନ୍ଦୀ ଭାବେ ରାଇରଙ୍ଗପୁର ଜେଲରେ ଅଛନ୍ତି ଏହି କୁନି ଝିଅଟିର ମା’।  ଜେଲ୍ ଭିତରେ ମା’ସହ ତାର କୁନି ଭଉଣୀ ବି ଅଛି । ଏଭଳି ସ୍ଥିତିରେ ନିସଙ୍ଗ ଜୀବନ କାଟୁଥିବା ଏହି ଝିଅଟିର ଭବିଷ୍ୟତ କଣ ହେବ ତାକୁ ନେଇ ଉଠିଛି ପ୍ରଶ୍ନ ।

ସୂଚନା ଅଧିକାରୀ ଆଇନ ବଳରେ ମିଳିଥିବା ତଥ୍ୟ

ସୂଚନା ଅଧିକାରୀ ଆଇନ ବଳରେ ମିଳିଥିବା ତଥ୍ୟ କହୁଛି, ରାଜ୍ୟରେ ବର୍ତ୍ତମାନ ୨ମାସରୁ ୬ବର୍ଷ ବୟସର ୪୬ ଶିଶୁ ଏବେ ବିଚାରାଧିନ ବନ୍ଦୀ ଥିବା ୩୬ ଜଣ ମା’ଙ୍କ ସହ କାଳ କାଟୁଛନ୍ତି କାଳ କୋଠରୀରେ।  ଯେଉଁ ବୟସରେ ସାଙ୍ଗସାଥୀଙ୍କ ମେଳରେ ଖେଳିକୁଦି ମଉଜ କରିବା କଥା, ସେହି ବୟସ କଟୁଛି ଜେଲ୍ ଭିତରେ । ଯାହାକୁ ନେଇ ମାନବାଧିକାର କର୍ମୀ ଉଦବେଗ ପ୍ରକାଶ କରିବା ସହ କହିଛନ୍ତି, ଏହା ମଡେଲ୍ ପ୍ରିଜନ୍ ମାନୁଆଲ୍‌ର ଉଲ୍ଲଂଘନ । ତେବେ ଏନେଇ ରାଜ୍ୟ ସରକାରଙ୍କ ପକ୍ଷରୁ ପ୍ରତିକ୍ରିୟା ମିଳିପାରି ନ ଥିବାବେଳେ ଶିଶୁଙ୍କ ସୁରକ୍ଷା ଉପରେ ଗୁରୁତ୍ୱ ଦେଇଛନ୍ତି ପୂର୍ବତନ ଜେଲ୍ ଅଧିକାରୀ ଏବଂ ସିଡବ୍ଲୁସି ସଦସ୍ୟ।