କୃଷକଙ୍କ ପାଖରେ ପହଞ୍ଚିବ ଯୋଜନା

ଭୁବନେଶ୍ୱର (ଓଡ଼ିଶା ରିପୋର୍ଟର): ଚାଷୀଙ୍କ ପାଇଁ ଆଜି ଏକ ନୂଆ ଯୋଜନାର ଶୁଭାରମ୍ଭ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାକ। ସଚିବାଳୟ ସମ୍ମିଳନୀ କକ୍ଷରେ ଅନୁଷ୍ଠିତ ଏହି ସମାରୋହରେ ମୁଖ୍ୟମନ୍ତ୍ରୀ “ସମବାୟ ଆପଣଙ୍କ ଦ୍ୱାରରେ” ଯୋଜନାର ଶୁଭାରମ୍ଭ କରିଛନ୍ତି। କୃଷକଙ୍କ ପାଇଁ ଉଦ୍ଦିଷ୍ଟ ଯୋଜନା ଲୋକଙ୍କ ପାଖରେ ପହଞ୍ଚାଇବାକୁ ଏହି ଅଭିଯାନ ଆରମ୍ଭ ହୋଇଛି। ଜୁନ୍ ୧ରୁ ଜୁଲାଇ ୩୧ ପର୍ଯ୍ୟନ୍ତ ୨ ମାସ ଧରି ଏହି ଅଭିଯାନ ଚାଲିବ। ଗ୍ରାମୀଣ ସମବାୟ ଋଣ ପ୍ରଦାନକାରୀ ସମିତି ଓ ସମବାୟ ବ୍ୟାଙ୍କ ୬୫ ପ୍ରତିଶତ କୃଷିଋଣ ପ୍ରଦାନ କରିଥାନ୍ତି। ୨୦୧୭-୧୮ ବର୍ଷରେ ଏହି ଅନୁଷ୍ଠାନ ୧୧ହଜାର ୫କୋଟି ଟଙ୍କା ଋଣ ଦେଇଥିବା ସମବାୟ ବିଭାଗ ତରଫରୁ କୁହାଯାଇଛି। କାର୍ଯ୍ୟକ୍ରମରେ ନାବାର୍ଡ ଓ ରାଜ୍ୟ ସମବାୟ ବ୍ୟାଙ୍କ ମଧ୍ୟରେ ଏକ ବୁଝାମଣାପତ୍ର ସ୍ୱାକ୍ଷରିତ ହୋଇଛି। ଏହା ରାଜ୍ୟରେ ଯୁଗ୍ମଦେୟଗୋଷ୍ଠୀର ଗଠନ ଓ ଋଣ ପ୍ରଦାନ ପାଇଁ ସହାୟକ ହେବ। ଏହି ଅବସରରେ ମୁଖ୍ୟମନ୍ତ୍ରୀ ସମବାୟ ବିଭାଗ ଦ୍ୱାରା ପ୍ରସ୍ତୁତ ଭିଜନ ଡକ୍ୟୁମେଣ୍ଟକୁ ଉନ୍ମୋଚନ କରିଥିଲେ।