ପୁରୀ (ଓଡ଼ିଶା ରିପୋର୍ଟର) ପୁରୀରେ କୋଭିଡ୍ ପରିଚାଳନାର ସାଂଘାତିକ ଚିତ୍ର । ସ୍ୱର୍ଗଦ୍ୱାରରେ ମୃତଦେହ ପହଞ୍ଚିବା ପରେ ଆସିଲା ମୃତକଙ୍କ ପଜିଟିଭ୍ ରିପୋର୍ଟ। ଏହାପରେ ସ୍ୱର୍ଗଦ୍ୱାରରୁ ପୁଣି ମେଡ଼ିକାଲ୍କୁ ଫେରି ଆସିଲା ଶବ । ଘଟଣାଟି ଏହିପରି । ପୁରୀ ସହରର ଜଣେ ବ୍ୟକ୍ତିଙ୍କୁ ଗତକାଲି ଜ୍ୱର ହେବାରୁ ତାଙ୍କ ସମ୍ପର୍କୀୟ କୋଭିଡ୍ ଟେଷ୍ଟ କରାଇଥିଲେ । କିନ୍ତୁ ରିପୋର୍ଟ ନେଗେଟିଭ୍ କି ପଜିଟିଭ୍ କୁହାଗଲାନି ।
ଶେଷରେ ଆଜି ଅସୁସ୍ଥ ହେବାରୁ ପୁରୀ ଜିଲ୍ଲା ମୁଖ୍ୟ ଡାକ୍ତରଖାନାକୁ ନେଇଥିଲେ ସମ୍ପର୍କୀୟ । କିନ୍ତୁ ସେଠାରେ ଡାକ୍ତର ମୃତ ଘୋଷଣା କରିଥିଲେ। ଏହାପରେ ମୃତଦେହକୁ ଘରକୁ ନେଇ ସେଠାରୁ ସ୍ୱର୍ଗଦ୍ୱାରକୁ ଶବକୁ କାନ୍ଧେଇ ନେଇଥିଲେ ପରିବାର ଓ ସମ୍ପର୍କୀୟ । କିନ୍ତୁ ସ୍ୱର୍ଗଦ୍ୱାରରେ ହିଁ ଜଣାପଡ଼ିଲା ସଂପୃକ୍ତ ବ୍ୟକ୍ତି ପଜିଟିଭ୍ ବୋଲି। ସେପଟେ ସ୍ୱର୍ଗଦ୍ୱାରକୁ ଏକ ଆମ୍ବୁଲାନ୍ସ ପଠାଯିବା ସହ ମୃତଦେହକୁ କୋଭିଡ୍ ହସ୍ପିଟାଲ୍କୁ ଫେରାଇ ଅଣାଯାଇଥିଲା ।
ଏହାପରେ ବ୍ୟବଚ୍ଛେଦ ପାଇଁ ପଠାଯିବା ସହ ଅନ୍ତିମ ସଂସ୍କାର ପାଇଁ ପଦକ୍ଷେପ ନିଆଯାଉଛି । ତେବେ ଏହି ଅବ୍ୟବସ୍ଥା ନେଇ ଏନେଇ ମେଡ଼ିକାଲ କର୍ତ୍ତୃପକ୍ଷଙ୍କ ପ୍ରତିକ୍ରିୟା ମିଳିନଥିବାବେଳେ ଜନସ୍ୱାସ୍ଥ୍ୟ ବିଭାଗ ଏଡିଏମ୍ କହିଛନ୍ତି, ସମସ୍ତ ସମ୍ପର୍କୀୟ ଏବଂ ମୃତଦେହ କାନ୍ଧେଇଥିବା ବ୍ୟକ୍ତିଙ୍କ କୋଭିଡ୍ ଟେଷ୍ଟ କରାଯିବ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
