ପାରାଦୀପ(ରମାକାନ୍ତ ନାୟକ): କୋର୍ଟଚାଲାଣ ବେଳେ ପୁଲିସ କବଳରୁ ଖସିଗଲା ଅଭିଯୁକ୍ତ । କୋର୍ଟଚାଲାଣ ପୂର୍ବରୁ ଅଧା ବାଟରୁ ମାରିଲା ଛୁ। ଗତକାଲି ରାତିରେ ଜଗତସିଂହପୁର ଜିଲ୍ଲା ପାରାଦୀପରେ ଏପରି ଘଟଣା ଘଟିଥିବା ବେଳେ ନାକେଦମ ହୋଇଛି ପୁଲିସ୍। ଏପରିକି ରାତି ଅନିଦ୍ରା ରହି ପୁଲିସ୍ ଅଭିଯୁକ୍ତକୁ ଖୋଜିଥିବା ବେଳେ ତାର ଟେର ପାଇପାରିନି।
ଅଭିଯୁକ୍ତ ଜଣକ ଅଠରବାଙ୍କିର ରବୀନ୍ଦ୍ର ମଣ୍ଡଳ ବୋଲି ଜଣାପଡିଛି। ବ୍ରାଉନସୁଗର ଚୋରା ବେପାର ଅଭିଯୋଗରେ ପାରାଦୀପ ଆଦର୍ଶ ଥାନା ପୁଲିସ ତାକୁ ଗିରଫ କରିବା ପରେ ଗତ ରାତିରେ କୋର୍ଟଚାଲାଣ କରୁଥିଲା।
ସେହି ସମୟରେ ପାରାଦୀପରୁ କୁଜଙ୍ଗ ନେବା ବାଟରେ ପିପଳଗୋଡା ନିକଟରୁ ଅଭିଯୁକ୍ତ ପୁଲିସକୁ ଚକମା ଦେଇ ଖସିଯାଇଛି। ଏହି ଘଟଣାକୁ ନେଇ ପାରାଦୀପ ଲକ୍ ଥାନାରେ ଆଉ ଏକ ମାମଲା ରୁଜୁ କରାଯାଇଛି।
ଦୁଇ ଥାନାର ପୁଲିସ ଚମ୍ପଟ ଅଭିଯୁକ୍ତକୁ ଧରିବା ପାଇଁ ରାତି ତମାମ ଛାନଭିନ ଚଳାଇଛନ୍ତି। ତେବେ ଏ ନେଇ ପାରାଦୀପ ପୁଲିସର ପ୍ରତିକ୍ରିୟା ମିଳି ପାରି ନାହିଁ।