କଟକ: କୋରାପୁଟ ବୈପାରିଗୁଡା ଲ୍ୟାଣ୍ଡମାଇନ୍ ବିସ୍ଫୋରଣରେ ପ୍ରାଣ ହରାଇଥିବା ସହିଦ ଶିବାଶିଷ ପଣ୍ଡାଙ୍କ ମରଶରୀର ଆଜି କଟକ ଚାଉଳିଆଗଞ୍ଜ ମୋତିବିହାର ସ୍ଥିତ ତାଙ୍କ ଘରକୁ ଆସିବ। ଏହାପରେ ଶେଷକୃତ୍ୟ ସଂପନ୍ନ ହେବ। ସହିଦ ହେବା ଖବର ପାଇବା ପରଠୁ ଶିବାଶିଷଙ୍କ ଘରେ ଶୋକାକୁଳ ପରିବେଶ ସୃଷ୍ଟି ହେଇଛି।
ଶିବାଶିଷଙ୍କର ୬ ଓ ୩ ବର୍ଷ ବୟସର ଦୁଇ ଝିଅ ଅଛନ୍ତି। ଅସମୟରେ ସାନପୁଅକୁ ହରାଇ ଧୈର୍ଯ୍ୟହରା ହୋଇପଡ଼ିଛନ୍ତି ବାପା ଗଜେନ୍ଦ୍ର ପଣ୍ଡା। ଗତ ରାତିରେ ସ୍ଥାନୀୟ ବିଧାୟକ ପ୍ରଭାତ ବିଶ୍ୱାଳ ଶିବାଶିଷଙ୍କ ପରିବାରକୁ ଭେଟିବା ସହ ଶୋକ ସନ୍ତପ୍ତ ପରିବାରକୁ ସମବେଦନା ଜଣାଇଥିଲେ।
ଶୁକ୍ରବାର ବୈପାରୀଗୁଡ଼ା ଥାନା ଅଞ୍ଚଳର ରାମଗିରିରେ ମାଓବାଦୀଙ୍କ ଲ୍ୟାଣ୍ଡମାଇନ୍ ବିସ୍ଫୋରଣରେ ବିଏସ୍ଏଫ୍ ଯବାନ୍ ଶିବାଶିଷ ଓ ଡେପୁଟି କମାଣ୍ଡାଣ୍ଟ ସୁନୀଲ୍ ବେହେରା ସହିଦ ହୋଇଥିଲେ। କାଳିଆଝୁଲା ଜଙ୍ଗଲରେ ୧୪୩ ବିଏସଏଫ୍ ଯବାନ କମ୍ୱିଂ ଅପରେସନ ଚଳାଇଥିବା ବେଳେ ଏହି ବିସ୍ଫୋରଣ ହୋଇଥିଲା।