ସୁନାମୁହିଁ ଘାଟରେ ଆଦିବାସୀଙ୍କ ଦାମୋଦର ପର୍ବ

<p>ବାରିପଦା (ଓଡ଼ିଶା ରିପୋର୍ଟର): ଆଦିବାସୀ ସାନ୍ତାଳ ସମ୍ପ୍ରଦାୟର ଦାମୋଦର ମେଳା ହୋଇଯାଇଛି। ଉତ୍ସବ ମୁଖର ହୋଇଉଠିଛି ବାରିପଦା ସହର ସୁନାମୁହିଁ ଘଟ। ସାମୁହିକ ଅସ୍ଥି ବିସର୍ଜନ କରିବା ପାଇଁ ଓଡ଼ିଶା ସମେତ ଝାଡ଼ଖଣ୍ଡ ଓ ପଶ୍ଚିମବଙ୍ଗର ବିଭିନ୍ନ ପ୍ରାନ୍ତରୁ ସାନ୍ତାଳ ସମ୍ପ୍ରଦାୟର ଲକ୍ଷାଧିକ ଲୋକ ଏଠାକୁ ଆସିଥାଆନ୍ତି।</p> <p>ବୁଢାବଳଙ୍ଗ, ଜରାଳି ଓ ସରାଳି ନଦୀର ସଂଗମ ସ୍ଥଳ ହେଉଛି ସୁନାମୁହିଁ ଘାଟ। ଏଠାରେ ଅସ୍ଥି ବିସର୍ଜନ କରିବା ପାଇଁ ରାଜକିୟ ଢଙ୍ଗରେ ରଙ୍ଗବେରଙ୍ଗର ନୂତନ ବସ୍ତ୍ର ପରିଧାନ କରି ମାଦଳ ଓ ଧୁମ&zwnj;୍&zwj;ସା ବଜାଇ ଗାଁ ମୁଖିଆଙ୍କ ନେତୃତ୍ୱରେ ଦଳଦଳ ଆଦିବାସୀ ମେଳାକୁ ମାଡି ଆସୁଛନ୍ତି। କୌତୁକିୟା ପୋଷାକ ପରିଧାନ ସହ ପାରମ୍ପାରିକ ବେଶଭୂଷାରେ ନୃତ୍ୟ ପରିବେଷଣରେ କମ୍ପି ଉଠୁଛି ପରିବେଶ। କାହିଁ କେଉଁ ଅମଳରୁ ମକର ସଂକ୍ରାନ୍ତିର ପର ଦିନଠାରୁ ଏଠାରେ ସାନ୍ତାଳ ସମ୍ପ୍ରଦାୟର ସାମୂହିକ ଅସ୍ଥି ବସର୍ଜନ କାର୍ଯ୍ୟ ହୋଇଆସୁଛି।</p> <p>ସାନ୍ତାଳ ସମ୍ପ୍ରଦାୟରେ ପରିବାରର ବର୍ଷକ ମଧ୍ୟରେ ମୃତ୍ୟୁ ବରଣ କରିଥିବା ବ୍ୟକ୍ତିଙ୍କ ଅସ୍ଥିକୁ ସଂରକ୍ଷିତ କରି ରଖାଯାଇଥାଏ। ତ୍ରିବେଣୀ ସଂଗମ କୁହାଯାଉଥିବା ଏହି ଘାଟରେ ପାରମ୍ପାରିକ ରୀତିରେ ଶାଳ ଗଛକୁ ଠାକୁର ଭାବେ ପୂଜା କରି ସେଠାରେ ଭୋଗ ଲଗାଇ ଲଣ୍ଡା ହେବା ସହ ସାମୁହିକ ଭାବେ ବୁଡ ପକାଇ ଅସ୍ଥି ବିସର୍ଜନ କରିଥାଆନ୍ତି। ଏହିଭଳି ସାମୂହିକ ଅସ୍ଥି ବିସର୍ଜନ କଲେ ପୂର୍ବ ପୁରୁଷ ଶାନ୍ତି ପାଇଥାଆନ୍ତି ବୋଲି ସାନ୍ତାଳ ସମ୍ପ୍ରଦାୟର ବିଶ୍ୱାସ ରହିଛି।</p>