ଭୁବନେଶ୍ୱର(ଓଡ଼ିଶା ରିପୋର୍ଟର): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ମିଳିଛି ଜୀବନବ୍ୟାପୀ ସାଧନା ସମ୍ମାନ। ନୂଆଦିଲ୍ଲୀର କ୍ୟାପିଟାଲ ଫାଉଣ୍ଡେସନ ସୋସାଇଟି ତରଫରୁ ନବୀନ ପଟ୍ଟନାୟକଙ୍କୁ ଏହି ସମ୍ମାନ ପ୍ରଦାନ କରାଯାଇଛି। ନୂଆଦିଲ୍ଲୀର ଇଣ୍ଡିଆ ଇଣ୍ଟରନ୍ୟାସନାଲ ସେଣ୍ଟରରେ ଆୟୋଜିତ ଏକ କାର୍ଯ୍ୟକ୍ରମରେ ସୁପ୍ରିମକୋର୍ଟର ପୂର୍ବତନ ପ୍ରଧାନବିଚାରପତି ଏନ୍. ଭି. ରମନ୍ନାଙ୍କ ହାତରୁ ଏହି ସମ୍ମାନଜନକ ପୁରସ୍କାର ଗ୍ରହଣ କରିଛନ୍ତି ନବୀନ ପଟ୍ଟନାୟକ।
ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି, ‘ଏହି ପୁରସ୍କାର ଓଡ଼ିଶାବାସୀଙ୍କ ଲାଗି ଉତ୍ସର୍ଗୀକୃତ। ମୋ ପ୍ରତି ଥିବା ସେମାନଙ୍କ ବିଶ୍ୱାସ, ବଡ଼ ପ୍ରେରଣା ଆଣିଦେଇଛି।ଓଡ଼ିଶାକୁ ସଶକ୍ତିକରଣ ପାଇଁ କାମ କରିବାକୁ ଉତ୍ସାହ ଯୋଗାଇଛି।’ ଏହି କାର୍ଯ୍ୟକ୍ରମରେ ଜଷ୍ଟିସ ଏ.କେ.ତ୍ରିପାଠୀ ଅଧ୍ୟକ୍ଷତା କରିଥିଲେ। ମଙ୍ଗଳବାର ଦିଲ୍ଲୀରୁ ଫେରିବେ ମୁଖ୍ୟମନ୍ତ୍ରୀ।
ସେପଟେ କ୍ୟାପିଟାଲ ଫାଉଣ୍ଡେସନ ସୋସାଇଟି ତରଫରୁ ସମ୍ମାନ ପାଇଥିବାରୁ ମୁଖ୍ୟମନ୍ତ୍ରୀଙ୍କୁ ସମ୍ବର୍ଦ୍ଧନା ଦେବାକୁ ବିଜେଡି ବ୍ୟାପକ ଆୟୋଜନ କରିଛି।
ଏପଟେ ନବୀନ ପଟ୍ଟନାୟକ ଏ ପୁରସ୍କାର ପାଇବାକୁ ନେଇ ରାଜନୀତି ଜୋର ଧରିଛି। ବିଜେପି ରାଜ୍ୟ ସାଧାରଣ ସମ୍ପାଦକ ପୃଥ୍ୱୀରାଜ ହରିଚନ୍ଦନ କହିଛନ୍ତି, ନିଜର ବାହାସ୍ଫୋଟ ଦେଖାଇବା ଲାଗି ବିଜେଡି ଏକ ପ୍ରକାର ପଲିଟିକାଲ ଷ୍ଟଣ୍ଟ ଦେଖାଇବାକୁ ଚେଷ୍ଟା କରୁଛି। ଏକଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବୁଝି ପାରୁଥିବେ। ଅଯଥା ଏଭଳି ପ୍ରଚାର କରିବାରୁ ବିଜେଡି ନେତାମାନେ ବିରତ ରୁହନ୍ତୁ ବୋଲି ମୁଖ୍ୟମନ୍ତ୍ରୀ କହିବା ଉଚିତ।
ଅନ୍ୟପଟେ ବିଜେଡି ଏହାର ଜବାବ୍ ରଖିଛି। ବିଜେଡି ବିଧାୟକ ପ୍ରଶାନ୍ତ ମୁଦୁଲି କହିଛନ୍ତି, ମୁଖ୍ୟମନ୍ତ୍ରୀଙ୍କ ୨୫ ବର୍ଷର କାର୍ଯ୍ୟ ସହ ସାଧନା ଲାଗି ଏହି ସମ୍ମାନ ମିଳିଛି। ବିରୋଧୀଙ୍କ କାମ ହେଲେ ବିରୋଧ କରିବା। ଜନସାଧାରଣ ଲଗାଦାର ୫ ଥର ଯେଉଁ ସ୍ନେହ ଦେଖାଉଛନ୍ତି ତାହା ହିଁ ପ୍ରକୃତ ଜବାବ୍ ବୋଲି ସେ କହିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
