ଭୁବନେଶ୍ୱର(ଓଡ଼ିଶା ରିପୋର୍ଟର):ଗତ ଦେଢମାସ ହେଲା ପୁଲିସ୍ ଓ ଓକିଲଙ୍କୁ ନେଇ ଉପୁଜିଥିବା ବିବାଦ ଏବଂ ଏହାଦ୍ୱାରା ହୋଇଥିବା ଅଦାଲତ ଅଚଳାବସ୍ଥାକୁ ଦୂର ଲାଗି ଏଥିରେ ମୁଖ୍ୟମନ୍ତ୍ରୀ ହସ୍ତକ୍ଷେପ କରିବାକୁ ଅପିଲ କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଏନେଇ ସାମାଜିକ ଗଣମାଧ୍ୟମରେ ସେ ଏକ ଭିଡିଓ ଜାରି କରିଛନ୍ତି । ସେ କହିଛନ୍ତି ଯେ, ଦୀର୍ଘଦିନ ଧରି ଓକିଲଙ୍କ ଆନ୍ଦୋଳନ ଜାରି ରହିଥିବା ବେଳେ ମୁଖ୍ୟମନ୍ତ୍ରୀ ନିରବ ରହିଛନ୍ତି। ଏହାଠାରୁ ତାଙ୍କର ଅପାରଗତାର ବଡ଼ ଉଦାହରଣ ଆଉ କ’ଣ ହୋଇପାରେ ବୋଲି ସେ ପ୍ରଶ୍ନ କରିଛନ୍ତି।
ସେ କହିଛନ୍ତି ଯେ, ଦଶହରା ପରେ ସମସ୍ତେ ନିଜ ନିଜ କାମକୁ ଫେରିଛନ୍ତି। ଓକିଲ ଓ ପୁଲିସ ବନ୍ଧୁ ମାନଙ୍କ ମଧ୍ୟରେ ଯେଉଁ ବିବାଦ ଦେଖାଦେଇଛି ତା’ର ସମାଧାନ ରାସ୍ତା ଏଯାଏ ବାହାରିନି । ଅଦାଲତ୍ କାର୍ଯ୍ୟ ସ୍ୱାଭାବିକ ହୋଇ ପାରୁନଥିବାରୁ ସାଧାରଣ ଲୋକଟିଏ ଏଥିର ପେଷି ହୋଇଗଲାଣି ।
ଅନେକ ଲୋକଙ୍କ ଚାକିରି, ଜମିଜମା ବିବାଦ, ସାମାନ୍ୟ ଜାମିନ୍ କୋର୍ଟରେ ହୋଇପାରୁନି । ଶ୍ରୀ ପ୍ରଧାନ କହିଛନ୍ତି ଯେ, ନ୍ୟାୟପାଳିକା ଓ କାର୍ଯ୍ୟପାଳିକା ମଧ୍ୟରେ ସାମ୍ନାସାମ୍ନି ପରିସ୍ଥିତି ସୃଷ୍ଟି ହୋଇଛି ।
ଏହାର ସମଧାନ କିପରି ବାହାରିବ ମୁଖ୍ୟମନ୍ତ୍ରୀ ହସ୍ତକ୍ଷେପ କରିବା ଆବଶ୍ୟକ । ଶ୍ରୀ ପ୍ରଧାନ କହିଛନ୍ତି ଯେ, ଦେଢ଼ରୁ ଦୁଇମାସ ହେଲା ଏମିତି ସ୍ଥିତି ଲାଗି ରହିଛି। ଏହା ଯେତେଶୀଘ୍ର ସମାଧାନ ହେବ ଗରିବ ଲୋକ ଓ ସାଧାରଣ ଲୋକ ନ୍ୟାୟ ପାଇବେ । ମୁଖ୍ୟମନ୍ତ୍ରୀ ହସ୍ତକ୍ଷେପ କରିବା ଦରକାର । ସେ ପ୍ରଶ୍ନ କରିଛନ୍ତି ଯେ, ତାଙ୍କର ଡିଜି କ’ଣ କରୁଛନ୍ତି ? ମୁଖ୍ୟଶାସନ ସଚିବଙ୍କ ଭୂମିକା ଅଛି କି ନାହିଁ ? ସମାଧାନ ପାଇଁ ଦାୟିତ୍ୱ କାହାକୁ ଦେବାକୁ ପଡିବ ବୋଲି ସେ ପ୍ରଶ୍ନ କରିଛନ୍ତି । ସବୁ କଥାରେ ଆଗରେ ପଡ଼ି ହସ୍ତକ୍ଷେପ କରୁଥିବା ମୁଖ୍ୟମନ୍ତ୍ରୀ ଏଥିରେ ବି ହସ୍ତକ୍ଷେପ କରିବାକୁ ସେ ଅପିଲ୍ କରିଛନ୍ତି ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
