ଭୁବନେଶ୍ୱର(ଓଡ଼ିଶା ରିପୋର୍ଟର): ଉଚ୍ଚ ମାଧ୍ୟମିକ ଶିକ୍ଷା ପରିଷଦ ଦ୍ୱାରା ପରିଚାଳିତ ଯୁକ୍ତ ଦୁଇ କଳା ଓ ବାଣିଜ୍ୟ ପରୀକ୍ଷା ଚାଲିଛି। ଆଜି ଯୁକ୍ତ ୨ ପରୀକ୍ଷାର ଦ୍ୱିତୀୟ ଦିନରେ ମାତୃଭାଷା ଓଡ଼ିଆ ପରୀକ୍ଷା ଥିଲା। ଯେଉଁଥିରେ କପି କରି ଧରା ପଡ଼ିଛନ୍ତି ୪୧ ଜଣ ପରୀକ୍ଷାର୍ଥୀ। ଉଚ୍ଚ ମାଧ୍ୟମିକ ଶିକ୍ଷା ପରିଷଦର ଡେପୁଟି କଣ୍ଟ୍ରୋଲର ପି.କେ.ଦାଶ ଏହି ସୂଚନା ଦେଇଛନ୍ତି।
ଚଳିତବର୍ଷ ୧,୧୪୩ ଟି ପରୀକ୍ଷା କେନ୍ଦ୍ରରେ ସାଢ଼େ ୩ ଲକ୍ଷରୁ ଅଧିକ ପରୀକ୍ଷାର୍ଥୀ ପରୀକ୍ଷା ଦେଉଛନ୍ତି। ଏଥିପାଇଁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି।
ସେପଟେ ସମ୍ବଲପୁର ଯମୁନା ଦେବୀ ଘରୋଇ କଲେଜର ୪୦ ଛାତ୍ରଛାତ୍ରୀଙ୍କ ଭବିଷ୍ୟତ ଅନ୍ଧାରକୁ ଠେଲି ହୋଇଯାଇଛି। କାରଣ କଲେଜରୁ ଆଡମିଟ୍ କାର୍ଡ ନ ମିଳିବାରୁ ପିଲା ଏଥର ପରୀକ୍ଷା ଦେଇପାରି ନାହାନ୍ତି। କଲେଜରେ ୬ ମାସ ହେବ ତାଲା ଝୁଲୁଥିବା ବେଳେ ଉଚ୍ଚ ମାଧ୍ୟମିକ ଶିକ୍ଷା ପରିଷଦର ସମ୍ବଲପୁର ଜୋନ୍ ଉପ ସମ୍ପାଦକ କହିଛନ୍ତି, ଏହା ଏକ ନକଲି କଲେଜ। ତେଣୁ ବନ୍ଦ ହୋଇଯାଇଥିବାରୁ ଛାତ୍ରଛାତ୍ରୀ ପରୀକ୍ଷା ଦେଇପାରିନାହାନ୍ତି।