କଳାହାଣ୍ଡି(ଓଡ଼ିଶା ରିପୋର୍ଟର):ଯୁବତୀଙ୍କୁ ଛୁରୀ ଦେଖାଇ ଗଣଦୁଷ୍କର୍ମ ମାମଲାର ଗୁମର ଫିଟିଛି। କଳାହାଣ୍ଡି ଏସ୍ପିଙ୍କ ନେତୃତ୍ୱରେ ପୁଲିସ ଘଟଣାସ୍ଥଳକୁ ଯାଇ ଖୋଳତାଡ଼ ଆରମ୍ଭ କରିବା ସହ ଘଟଣା ଘଟାଇଥିବା ଯୌନ ପିପାସୁଙ୍କ ସୁରାକ ପାଇଛି। ଯୁବତୀ ଜଣକ ଏଏନ୍ଏମ୍ ନର୍ସିଂ ଛାତ୍ରୀ ବୋଲି ଜଣାପଡ଼ିଛି।
ଗତ ୧୪ ତାରିଖରେ ଏହି ଘଟଣା ଘଟିଥିଲା। ପୀଡ଼ିତା ଯୁବତୀ ଜଣକ ଧର୍ମଗଡ଼ ଉପଖଣ୍ଡ ପର୍ଲା ଗାଁର ନରେନ୍ଦ୍ର ଶବର ନାମକ ଜଣେ ବସ୍ ଡ୍ରାଇଭରଙ୍କ ସହ ଭବାନୀପାଟଣାରୁ ଜୁନାଗଡ଼ ଅଭିମୁଖେ ବାଇକ୍ରେ ଆସୁଥିଲେ।
ସେହି ସମୟରେ ବନମାଳୀପୁର ନିକଟ ତୁଳସୀପୁର ଘନ ଜଙ୍ଗଲ ରାସ୍ତାରେ ୫ ରୁ ୬ ଜଣ ଯୁବକ ତାଙ୍କୁ ଛୁରୀ ଦେଖାଇ ଅଟକାଇ ଗଣଦୁଷ୍କର୍ମ କରିଥିଲେ। ଦୁଷ୍କର୍ମକାରୀମାନେ ସେହି ସମୟରେ ଭିଡିଓ ମଧ୍ୟ ରେକର୍ଡ କରିଥିଲେ। ଯାହା ବର୍ତ୍ତମାନ ଭାଇରାଲ୍ ହେଉଛି।
ଏହି ଘଟଣା ସମ୍ପର୍କରେ ଗଣମାଧ୍ୟମରେ ପ୍ରସାରଣ ପରେ ପୋଲିସ ତତ୍ପରତା ପ୍ରକାଶ କରିବା ସହ ଘଟଣାର ଖୋଳତାଡ଼ ଜାରି ରଖିଛି। ପୀଡ଼ିତାଙ୍କ ପକ୍ଷରୁ ମଧ୍ୟ ଜୁନାଗଡ଼ ଥାନାରେ ଏତଲା ମଧ୍ୟ ଦିଆଯାଇଛି।