ନୂଆ ଟେକ୍ନୋଲୋଜି: ୩ ଫୁଟ୍‌ ଉଚ୍ଚକୁ ଉଠିଲା ୩ ମହଲା କୋଠା

ଭୁବନେଶ୍ୱର (ଓଡ଼ିଶା ରିପୋର୍ଟର): ତଳିଆ ଅଞ୍ଚଳରେ ଘର କରିଛନ୍ତି କି? ଆଉ ଭାଙ୍ଗିବାକୁ ପଡିବନି। କାରଣ ଆସିଯାଇଛି ନୂଆ ଟେକ୍ନୋଲୋଜି। ଜ୍ୟାକ୍ ଲଗାଇ ଉଠାଇ ହେଉଛି ଘର। କଥାଟା ବିଶ୍ୱାସ ଲାଗୁନଥିଲେ ମଧ୍ୟ ସତ। ରାଜଧାନୀର ଜୟଦେବ ବିହାର ଅଞ୍ଚଳରେ ଏମିତି ଏକ ଘରକୁ ନେଇ ଏବେ ଚର୍ଚ୍ଚା। ଏଥିପାଇଁ ଖର୍ଚ୍ଚ ହେବ ପ୍ରାୟ ୧୫ଲକ୍ଷ ଟଙ୍କା।

ଜୟଦେବ ବିହାର ପ୍ଲଟ ନମ୍ବର ୮୩୦। ଘର ନାଁ ଆଶ୍ରୟ। ଏହି ୩ ମହଲା କୋଠାଟିକୁ ବିନା ଭଙ୍ଗାରେ ୪ ଫୁଟ୍‌ ଉପରକୁ ଉଠାଯାଉଛି। କୋଠାର ଫାଉଣ୍ଡେସନ ସ୍ଥାନରେ ଧାଡ଼ି ଧାଡ଼ି ହୋଇ ଲାଗିଛି ୧୫୦ ଟନ୍ କାପାସିଟ୍‌ର ୨୫୦ରୁ ଅଧିକ ଲୁହା ଜ୍ୟାକ୍। କାମରେ ଲାଗିଛନ୍ତି ବିହାରରୁ ଆସିଥିବା ୨୦ ଜଣ ଶ୍ରମିକ। ଧୀରେ ଧୀରେ ୩ ମାସ ଭିତରେ କାମ ସାରିବାକୁ ଲକ୍ଷ୍ୟ ରଖିଛନ୍ତି ଠିକାଦାର। ଏମାନଙ୍କ ପାଖରେ ସିନା ସିଭିଲ୍‌ ଇଞ୍ଜିନିୟରିଂ ସାର୍ଟିଫିକେଟ୍‌ ନାହିଁ ହେଲେ ଅଭିଜ୍ଞତା କିନ୍ତୁ ସଫଳତା ଆଣିଦେବ।

ଘର କାମ ନେଇଥିବା ଠିକାଦାର ବବ୍‌ଲୁ ଯାଦବ କହିଛନ୍ତି-“ଏମିତି କୋଠା ଉଠାଇବା କାମ ଆମେ ୪ ବର୍ଷ ଧରି କରିଆସୁଛୁ। ଏହା ଭିତରେ ଆମେ ୪୦୦ରୁ ଅଧିକ କୋଠା ଉଠାଇ ସାରିଲୁଣି। କିନ୍ତୁ କେଉଁଠି ବି କିଛି ସମସ୍ୟା ଦେଖାଦେଇନି। ଆମେ ୪ରୁ ୬ ମହଲା ପର୍ଯ୍ୟନ୍ତ ଘର ଉଠାଇ ପାରିବୁ।”

ଘର କାହିଁକି ଉଠାଇବାକୁ ପଡ଼ିଲା?

ଘର ମାଲିକ ବସନ୍ତ ମିଶ୍ର ୧୫ ବର୍ଷ ତଳେ ଏହି ୩ ମହଲା ଘର ନିର୍ମାଣ କରିଥିଲେ। ଡ୍ରେନ୍ ଓ ରାସ୍ତା କାମ ଯୋଗୁଁ ପ୍ରାୟ ଅଢେଇ ଫୁଟ୍ ତଳେ ରହିଯାଇଥିଲା। ବର୍ଷା ଦିନରେ ଗ୍ରାଉଣ୍ଡ ଫ୍ଲୋରରେ ଅଣ୍ଟାଏ ପାଣି ଜମୁ ରହୁଥିଲା। ଯାଇ ହେଉନଥିଲା। ତେଣୁ ଘର ଭାଙ୍ଗି ଆଉ ଥରେ ତିଆରି କରିବା ପାଇଁ ସାହି ପଡ଼ିଶା ଓ ସମ୍ପର୍କୀୟ ପରାମର୍ଶ ଦେଉଥିଲେ। ମାତ୍ର ବସନ୍ତ ବାବୁ ଘର ନଭାଙ୍ଗି ଜଣେ ସିଭିଲ ଇଞ୍ଜିନିୟର ବନ୍ଧୁଙ୍କଠାରୁ ନୂଆ ଟେକ୍ନୋଲୋଜି ସମ୍ପର୍କରେ ତଥ୍ୟ ପାଇଁ ଘର ଉଠାଇବାକୁ ବିହାରରୁ ମିସ୍ତ୍ରୀ ଡାକି ଥିଲେ। ଇତି ମଧ୍ୟରେ ଘର ପ୍ରାୟ ୩ ଫୁଟ୍ ଉଠି ସାରିଲାଣି। ଆଗକୁ ଆଉ ଗୋଟିଏ ଫୁଟ୍ ଉଠିବ। ହେଲେ ଘରର କୌଣସି କ୍ଷତି ହୋଇନି।

ଘର ନଭାଙ୍ଗି ଉପରକୁ ଉଠାଯିବା ଟେକ୍ନୋଲୋଜି ଓଡ଼ିଶାରେ ପ୍ରଥମ ହୋଇଥିଲେ ମଧ୍ୟ ପ୍ରାୟ ୧୦ବର୍ଷ ହେଲା ଚାଲିଲାଣି ରୁଷ୍ ଓ କାନାଡ଼ାରେ। ଏହା ବହୁଳ ବ୍ୟବହାର ହେଉଥିବା ବେଳେ କିଛି ବର୍ଷ ତଳେ ମୁମ୍ବାଇରେ ଏକ ୩୬ ମହଲା କୋଠାକୁ ଏଭଳି ଢଙ୍ଗରେ ଉଠା ଯିବା ଘଟଣା ବେଶ୍ ଚର୍ଚ୍ଚାର ପରିସରକୁ ଆସିଥିଲା।