ଭୁବନେଶ୍ୱର (ଓଡ଼ିଶା ରିପୋର୍ଟର): ଭୁବନେଶ୍ୱରରେ ସେରୋଲୋଜିକାଲ୍ ସର୍ଭେ ସରିଛି। ରାଜଧାନୀରେ ଶହେ ବ୍ୟକ୍ତିଙ୍କ ଅନୁପାତରେ ୧.୪ ପ୍ରତିଶତ ଲୋକଙ୍କ ଭିତରେ ରୋଗ ପ୍ରତିରୋଧକ ଶକ୍ତି ବୃଦ୍ଧି ପାଇଛି। ଆଜି ଏହି ସୂଚନା ଦେଇଛନ୍ତି ଭୁବନେଶ୍ୱର RMRC ନିର୍ଦ୍ଦେଶିକା ଡ.ସଂଘମିତ୍ରା ପତି।
ସେ କହିଛନ୍ତି ଯେ ସଂକ୍ରମଣ ହାର, ସ୍ଥିତି ଓ ଆଣ୍ଟିବଡି ଅଗ୍ରଗତି ଜାଣିବାକୁ ସର୍ଭେ ହେଉଛି। ଭୁବନେଶ୍ୱରରେ କମ୍ୟୁନିଟି, ହାଇରିସ୍କ ଓ ଗ୍ରୁପ୍ ସେରୋ ସର୍ଭେ ସରିଛି। ଶହେ ବ୍ୟକ୍ତିଙ୍କ ଅନୁପାତରେ୧.୪% ଲୋକଙ୍କ ଭିତରେ ରୋଗ ପ୍ରତିରୋଧକ ଶକ୍ତି ବୃଦ୍ଧି ପାଇଛି। ହାଇରିସ୍କ ଗ୍ରୁପରେ ରୋଗ ପ୍ରତିରୋଧକ ଶକ୍ତି ବୃଦ୍ଧି ପାଖାପାଖି ସମାନ ରହିଛ।
ସେ ଆହୁରି କହିଛନ୍ତି, ରାଜଧାନୀରେ ଜୁନ୍ ମାସର ସଂକ୍ରମଣ ଜାଣିବାକୁ ଜୁଲାଇ ମାସରେ ସର୍ଭେ ହୋଇଥିଲା। ପୁଣି ଥରେ ଭୁବନେଶ୍ୱରରେ ସେରୋ ସର୍ଭେ ହେବ। ଅଗଷ୍ଟ ମଧ୍ୟ ଭାଗରେ ୨ୟ ପର୍ଯ୍ୟାୟ ସେରୋ ସର୍ଭେ ହେବ। ଭୁବନେଶ୍ୱର, ପୁରୀ ପରେ ଆଜିଠୁ ବ୍ରହ୍ମପୁରରେ ବି ସେରୋଲୋଜିକାଲ୍ ସର୍ଭେ ଆରମ୍ଭ ହୋଇଛି।
ସୂଚନାଯୋଗ୍ୟ, ରାଜ୍ୟରେ ଦିନକୁ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ି ବଢ଼ି ଚାଲିଛି। ରାଜ୍ୟରେ ମୋଟ ଆକ୍ରାନ୍ତ ସଂଖ୍ୟା ୩୬,୨୯୭ରେ ପହଞ୍ଚିଥିବା ବେଳେ ୨୧,୯୫୪ ଜଣ ସୁସ୍ଥ ହୋଇ ସାରିଲେଣି। ଏବେ ରାଜ୍ୟରେ ୧୪,୦୯୫ କରୋନା ଆକ୍ରାନ୍ତ ଚିକିତ୍ସିତ ହେଉଛନ୍ତି। ୨୦୭ ଜଣଙ୍କର ମୃତ୍ୟୁ ଘଟିଛି।