ସୋର(ଶଶୀକାନ୍ତ ବେହେରା): ପୁଲିସ ଗୋଡ଼ାଇବାରୁ ମଦ ବୋଝେଇ ଗାଡ଼ି ରାସ୍ତା ପାଖରେ ଓଲଟି ପଡ଼ିଲା। ଏପରି ଘଟଣା ବାଲେଶ୍ୱର ଜିଲ୍ଲାରେ ଘଟିଛି। ପୁଲସ ମଦ ବେପାରୀଙ୍କୁ ଗିରଫ କରିବା ସହିତ ଗାଡ଼ି ଓ ମଦ ଜବତ କରିଛି।
ପୁରୁଣା ବାଲେଶ୍ୱର ଅଞ୍ଚଳରୁ ସେଖ ଆଲାମ, ସେଖ ଜବର ଓ ସେଖ ହବିବୁଲା ଏକ ବୋଲେରୋରେ ୩୦୦ ଲିଟରରୁ ଅଧିକ ମଦ ଧରି ସୋର ଅଭିମୁଖେ ଆସୁଥିଲେ। ଏ ସମ୍ପର୍କରେ ଗୋପାଳପୁର ଥାନା ପୁଲିସ ଜାଣିପାରି ଗାଡ଼ିଟିକୁ ପିଛା କରିଥିଲା। ପୁଲିସ ଗାଡ଼ି ଦେଖି ମଦ ବେପାରୀମାନେ ଦ୍ରୁତ ଗତିରେ ପଳାଇବାକୁ ଉଦ୍ୟମ କରୁଥିଲେ। ତେବେ ସାହସପୁର ନିକଟରେ ଗାଡ଼ିଟି ଭାରସାମ୍ୟ ହରାଇ ରାସ୍ତା ତଳକୁ ଖସି ପଡ଼ିଥିଲା। ଫଳରେ ଗାଡ଼ି ଭିତରେ ଥିବା ତିନି ମଦ ବେପାରୀ ଆହତ ହୋଇଥିଲେ। ଘଟଣାସ୍ଥଳରେ ପହଞ୍ଚି ପୁଲିସ ସେମାନଙ୍କୁ ଉଦ୍ଧାର କରି ମେଡିକାଲ୍ରେ ଭର୍ତ୍ତି କରିଥିଲେ। ପରେ ସେମାନଙ୍କୁ କୋର୍ଟ ଚାଲାଣ କରିଛି। ଅନ୍ୟପକ୍ଷରେ ପୁଲିସ ମଦ ଓ ଗାଡ଼ିକୁ ଜବତ କରିଛି।