ଭୁବନେଶ୍ୱର(ଓଡ଼ିଶା ରିପୋର୍ଟର): ଭୁବନେଶ୍ୱର ଲିଙ୍ଗରାଜ ମନ୍ଦିରରେ ଉଠିଲା ମହାଦୀପ। ନିର୍ଦ୍ଧାରିତ ସମୟର ଅଧ ଘଣ୍ଟାଏ ପୂର୍ବରୁ ଉଠିଛି ମହାଦୀପ। ଲକ୍ଷାଧିକ ଭକ୍ତ ମହାଦୀପ ଦର୍ଶନ କରି ମହାପ୍ରଭୁଙ୍କ ଆର୍ଶୀବାଦ ନେଇଥିଲେ। ପୁରୀର ଶ୍ରୀଶ୍ରୀ ଲୋକନାଥଙ୍କ ପୀଠରେ ଭୋର୍ ୪ଟାରେ ଓ ବାବା ଆଖଣ୍ଡଳମଣିରେ ଭୋର ୫ଟାରେ ମହାଦୀପ ଉଠିବ ବୋଲି ଜଣାପଡ଼ିଛି।
ମନରେ ଅତୁଟ ଭକ୍ତି, ତୁଣ୍ଡରେ ଶିବ ନାମ। ପବିତ୍ର ମହାଶିବରାତ୍ରୀରେ ପ୍ରଭୁ ଲିଙ୍ଗରାଜଙ୍କ ଦର୍ଶନ ପାଇଁ ଦିନ ତମାମ ଏକାମ୍ର କ୍ଷେତ୍ରରେ ଲାଗିଛି ଭକ୍ତଙ୍କ ଲମ୍ବା ଲାଇନ୍। ଭୋର୍ ୩ଟାରେ ମନ୍ଦିର ଖୋଲାଯାଇ ଠାକୁରଙ୍କ ନୀତିକାନ୍ତି ସରିବା ପରେ ଆରମ୍ଭ ହୋଇଥିଲା ସାହାଣମେଲା ଦର୍ଶନ। ସହଳ ଜାଗର ନୀତି ଶେଷ କରି ନିର୍ଦ୍ଧାରିତ ସମୟର ପ୍ରାୟ ଅଧ ଘଣ୍ଟାଏ ପୂର୍ବରୁ ମହାଦୀପ ମହାପ୍ରଭୁ ଲିଙ୍ଗରାଜ ମନ୍ଦିର ଉପରକୁ ଉଠିଛି।
ସେହିପରି କଟକର ଧବଳେଶ୍ୱର ପୀଠ ଶିବମୟ ହୋଇ ପଡ଼ିଛି। ଏଠି ରାତି ଗୋଟାଏରେ ଉଠିବ ମହାଦୀପ। ଭିଡ଼କୁ ଦୃଷ୍ଟିରେ ରଖି ଝୁଲାପୋଲଠୁ ମନ୍ଦିର ବେଢ଼ା, ନଦୀଘାଟ ପର୍ଯ୍ୟନ୍ତ ସିସିଟିଭି ନଜରରେ ରହିଛି।
ଭଦ୍ରକ ଜିଲ୍ଲାର ଆରଡ଼ିରେ ଶିବରାତ୍ରୀ ପାଇଁ ହୋଇଛି ବ୍ୟାପକ ଆୟୋଜନ। ଆଜି ସକାଳ ସାଢ଼େ ୫ଟାରୁ ରାତି ସାଢ଼େ ୧୧ଟା ପର୍ଯ୍ୟନ୍ତ ସାହାଣମେଲା ଦର୍ଶନ ହୋଇଥିଲା। ପରେ ରାତି ଗୋଟାଏ ବେଳେ ବାବା ଆଖଣ୍ଡଳମଣିଙ୍କର ଅନୁଷ୍ଠିତ ହେବ ସୁନାବେଶ। ଉଭୟ ସୁନାବେଶ ଓ ମହାଦୀପ ଦର୍ଶନ ପାଇଁ ଉତ୍କଣ୍ଠାରେ ଅଛନ୍ତି ଭକ୍ତ। ରାତି ସାଢ଼େ ୪ଟାରୁ ୫ଟା ଭିତରେ ମହାଦୀପ ଉଠିବ।
ପଶ୍ଚିମ ଓ ଦକ୍ଷିଣ ଓଡ଼ିଶାର ସମସ୍ତ ଶୈବପୀଠରେ ମଧ୍ୟ ଜାଗର ଯାତ୍ରା ପାଇଁ ହୋଇଛି ବ୍ୟାପକ ପ୍ରସ୍ତୁତି। କୋରାପୁଟ ଜିଲ୍ଲାର ଗୁପ୍ତେଶ୍ୱର, ବଲାଙ୍ଗିରର ହରିଶଙ୍କର ଓ କଳାହାଣ୍ଡିର ବେଲଖଣ୍ଡି ଶିବ ମନ୍ଦିରରେ ଭକ୍ତଙ୍କ ଗହଳି ଲାଗିଛି।