ସମ୍ବଲପୁର(ସଞ୍ଜୟ ଜେନା): ସ୍ତ୍ରୀକୁ ହତ୍ୟା କରିବା ଅଭିଯୋଗରେ ପୁଲିସ୍ ଜଣେ ବ୍ୟକ୍ତିକୁ ଗିରଫ କରିଛି। ତା ନାଁ ଚଗଲା ସେଠୀ। ତା’ ଘର ସମ୍ବଲପୁର ଜିଲ୍ଲା ନାକଟିଦେଉଳ ଥାନା ଅନ୍ତର୍ଗତ ହିତସରା ଗାଁରେ।
ମୃତ ମହିଳାଙ୍କ ନାଁ ସୁଲୋଚନା ସେଠୀ। ଅକ୍ଟୋବର ୩୦ ତାରିଖ ରାତିରେ ଚଗଲା ତାଙ୍କୁ ଗାଁ ପାଖ ଜଙ୍ଗଲକୁ ନେଇ ହତ୍ୟା କରିଥିବା ପୁଲିସ୍ ଆଗରେ କହିଛି।
ସୁଲୋଚନାଙ୍କୁ ହତ୍ୟା କରିବା ପରେ ଚଗଲା ଚୁପ୍ ଥିଲା। କିଛି କହୁ ନଥିଲା। ଗାଁ ଲୋକେ ବି ସୁଲୋଚନାଙ୍କୁ ଖୋଜାଖୋଜି କରି ପାଇ ନଥିଲେ।
ତନ୍ତ୍ରମନ୍ତ୍ର ପାଇଁ ସୁଲୋଚନାଙ୍କୁ ବଳି ଦିଆଯାଇଥିବା ଗାଁ ଲୋକେ ଅଭିଯୋଗ କରିବା ସହିତ ଚଗଲାକୁ ସେମାନଙ୍କୁ ହସ୍ତାନ୍ତର କରିବା ପାଇଁ ଦାବି କରିଥିଲେ। ଫଳରେ କିଛି ସମୟ ପାଇଁ ଅପ୍ରୀତିକର ସ୍ଥିତି ସୃଷ୍ଟି ହୋଇଥିଲା।
ସମ୍ବଲପୁର ଏସ୍ପି ସଞ୍ଜୀବ ଅରୋରା କହିଛନ୍ତି ଯେ ଏହା ବଳି ନୁହେଁ, ଅଭିଯୁକ୍ତର ମାନସିକ ବିକୃତି ରହିଛି। ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ଜଣାପଡ଼ିବ।